意識不良?

最近有個新廣告出街, 有兩個細佬戚眉戚眼咁.... 係啦, 就係吉百利朱古力廣告.

其實我對呢個廣告無乜好感, 因為我覺得兩個小朋友的面孔有點人工化, 像大人的面孔key 在小朋友的身上, 而戚眉部分更覺得假. 至於個message 都唔算好特出o者.

但原來呢個廣告有好多人投訴, 話搞到D小朋友有樣學樣, 大人唔鐘意wor.... 要求停播. 唔係化, 咁都要投訴? 咁就要停播? 使唔使咁嚴重呀?

我覺得, 要停播, 要管制, 不如先搞點最近的o靚模先啦!

那班所謂的model, 日日在展示自己美好身段, 又日日都搬弄是非, 展開罵戰. 有的寧可輟學揾快錢, 有的努力向上爬, 但方法卻是約會富家公子, 然後放料給記者, 讓記者到現場拍照, 並在娛樂版頭版指她成功釣得金龜..... 記者更指這位o靚模「有身材又有腦」.

哦! 原來成功 = 識揾快錢, 有腦 = 識得釣金龜

這些新聞又如何? 那些相片又如何? 難道又可以出街嗎? 吉百利廣告內容, 總比這些新聞和相片來得清純吧!

看來那些家長只係為投訴而投訴0者!

變刑金剛 vs. IQ博士

呢個星期去夏令會, 係新世紀廣場巴士總站搭巴士直去嶺南. 新世紀廣場有Transformer 展覽, 其中一個成兩層樓咁高.

其實呢個展覽都做左一段時間, 而且我對呢隻野無乜興趣, 所以都無停低看看, 不過今次.... 既然有時間, 又有帶相機, 影番幾幅相先.



悠長假期就快結束, 要玩埋呢兩日啦! 上facebook 見姊妹們去青衣城看IQ博士展覽, 我又去....

呢排真係好多IQ博士的產品出現, 好似話翻做卡通添, 懷舊熱又出現啦!

獎勵

老公take up 左夏令會籌委工作, 足足忙左兩個月. 夏令會終於曲終人散啦, 老公鬆番口氣. 而且佢尋日返來, 好開心咁同我分享左個camp 的笑料, 同埋佢係個camp 的領受, 解開一D心結.....

本來今日想去青衣城看IQ博士展覽, 不過, 最後我都係選擇唔去, 煲啖靚湯, 煮D好送慰勞下佢 (雖然尋晚去和民食左餐好的, 但自己煮梗係唔同D啦!)

三送一湯組合

青紅蘿蔔豬骨湯

醉雞翼

菜心炒牛肉

蝦

好味, 好味, 特別要講下醉雞翼的材料同做法, 話說上次跟住阿媽秘方整, 覺得太鹹. 今次上網做下research 先, 得出以下結論

材料:

雞翼2磅

薑一片

醉雞汁 (我想自己溝, 唔用李 x 記的醉雞汁)

花雕酒一碗

魚露一碗

糖5茶匙

做法:

1. 煲滾水, 加薑片, 將雞翼放在滾水中煮至全熟

2. 倒掉滾水, 用水喉水沖洗過冷河

3. 再用冰水洗掉生水

4. 預備好醉雞汁, 將冷卻的雞翼放入醉雞汁中

5. 放入雪櫃浸2小時, 定時反下雞翼, 讓味道均勻

今次無咁鹹啦, 不過我覺得可以再多D糖.

夏令會 (2)

尋晚係夏令會培靈會最後一夜, 我又去聽啦, 講員都係果個.

經文: 提後4:1-8, 徒1:8
內容:
1. 耶穌遺囑 vs. 保羅遺囑
- 徒1:8是耶穌的遺囑, 他復活後不即時升天為要扶起軟弱的門徒和談論神國的事
- 提後4:1-8是保羅的遺囑, 是保羅對門生提摩太的最後勸勉, 但與耶穌的遺囑意思相同 (務要傳道 vs. 作我的見證)
- 保羅認為, 無論任何環境, 得時不得時, 務要傳道, 要專尋心, Always be ready

2. 為何保羅這樣勸勉
- 這是主的命令
- 憑著神的囑附
- 要努力, 有恆心
- 不傳福音的, 是因為沒有愛心, 也沒有愛主的心
- 要接受訓練, 抓住傳福音的機會

講員分享他過往的工作和培訓的情況, 那些正在受訓的學員最令我感動和配服. 而他自己長期周圍飛去帶領培訓工作也令大家對他肅然起敬. 畢竟他年紀不輕, 要長期搭長途機飛來飛去是很辛苦的, 但為堅持他的信念才這麼努力呀!

呢晚的培靈會overun 成個鐘, 不過大家都唔介意, 我都係咁話, 我重要去埋獻心會先走. 嘩! 好夜wor.... 到時先算啦!

去到獻心會, 姊妹K 比左張獻心卡比我, 一看內容, 第一 (接受耶穌 / 受洗) 和第四 (成為傳道人)我都唔揀啦, 所以就係第二 (作好見證), 第三 (報讀神學課程)中選擇. 但個刻我覺得, 作好見證似乎講了好多次, 人也應該進步, 不要成日停留在這階段了, 所以, 我選擇了 3. 希望真係揾到適合的課程啦!

姊妹V 的奶奶雖未信主, 但今次也有來參加成個camp, 而呢晚重決志信主添! 大家都好感動呀!

結果, 完晒所有聚會都成11點, 返到市區成12點架啦, 我只係食左個tea set, 好肚餓呀! 老公建議我搭的士, 但我始終覺得, 一個女仔夜猛猛搭的士唔安全, 都係搭巴士啦!

點知, 有對夫婦都離開嶺南返九龍, 佢地有車呀, 老公見狀即刻幫我折住呢架順風車, 12點前就返到屋企啦! 真係唔該晒!

食過番尋味

上次整左藍莓鬆餅粉, 真係好方便, 而且幾好食添wor.

星期日老公入左camp, 我一個人又去大埔吉吉島行下, 竟然重見到個隻好方便的鬆餅粉, 一口氣買左3包. 不過, 藍莓鬆餅粉就賣晒啦. 好彩, 後來去TST City Super 比我買到. Yeah!!!


去聽夏令會晚堂之前重有咁多時間, 一於整下餅先.

今日整蜜糖鬆餅同埋奶油鬆餅

材料: 半杯水, 鬆餅粉一包

做法: 基本上同上次一樣, 不過今次加水後變成粉團, 焗爐溫度都係180度, 焗約35分鐘.

一路焗鬆餅, 一路聞到蜜糖同奶油D香味...em... 正呀


蜜糖鬆餅


奶油鬆餅


食落都OK 啦, 不過蜜糖味唔多覺, 奶油鬆餅就無乜特別.


返工之前整埋最後兩包先

夏令會 (1)

今年教會夏令會我又唔去啦, 唔同既係我今年都會去聽晚堂. 尋晚係晚堂講員的第二堂道, 一於去嶺南大學聽.

主題: 注目永恆 (係我自己定的)

講員引用好多經文
林前3:6-9, 12-15, 提前6:17-19, 啟7:9-12, 啟14: 1-5, 林後5:1-2, 4:18, 林後3:7-11

講道開始講員播左好多條片, 講述10/40之窗 (北緯10度至40度地區, 佔全世界人口8成以上, 但卻係最多未得之民的地方, 而且很多國家禁止西方宣教士進入)的福音需要

內容:

1. 現在 vs. 永恆

- 我們要為不是時間的將來 (永恆)努力, 要預備將來. 主耶穌再來是交帳, 審判的日子

- 新天新地中有很多人, 從各族各方來敬拜神, 但有一部分人卻能跟著耶穌的, 那些是付過代價的人. 人要得生命是由耶穌付上代價, 但人要得冠冕卻要自己付出代價.

- 要投資永恆, 包括美好見證, 打屬靈的仗, 結福音的果子

- 要學習札根永恆, 要顧念所不見的, 永遠的事

2. 苦難

- 保羅認為要著眼極重無比永遠的榮耀

- 榮耀多少, 看今日所承受的苦楚

- 事奉主, 要面對人的軟弱, 撒旦攻擊, 但靠神剛強

3. 天上的榮光

- 未看地上的榮光前, 先看看天上的榮光

總結: 基督徒要有屬靈眼光, 永恆眼光, 要札根永恆, 投資永恆, 才可專心一生事奉主. 有穿透眼光看別人看不見的事

對自己的提醒

1. 一直都在思想在新教會的事奉方向, 不過總是不願踏前一步, 總覺得不是自己想做的, 神提醒要著眼永恆, 不要單看目前

2. 美好的見證, 打屬靈的仗, 這是一生之久的功課, 仍要努力學習.

晚堂培靈會結束就搭車出市區, 不過返屋企前來個豐富宵夜, 一人獨享豐富半價壽司.... ^^

調較時差

最後一個星期的悠長假期啦, 要好好利用

呢3個月以來日日都訓到皇朝百晏, 下個星期開始要回復7點幾8點起身, 所以, 呢個星期要好好調較時差, 費時返新工恰眼訓....

尋晚較好鬧鐘8點要起身, 點知..... 都係失敗.... 8點半先起到身... 都好, 算啦!

開電視, 見到久違了的香港早晨.......

梳洗, 上網, 靈修... 11:30am 差唔多做晒, 重寫好blog 添, 早起身, 時間真係好用.

今晚要去夏令會呀!

香香生日會

大懵契媽去完四川返來之後, 都未聯絡契女阿爸阿媽補祝生日. 卒之由契女老豆出馬揾我.....

最後決定去中環One Bar 食悠長lunch buffet.

香香大個女啦, 識自己用刀叉, 重自己食野, o力o力!

呢度D野食唔算好多, 但勝在人少, 而且可以食四個鐘頭, 可以慢慢食, 同朋友傾下計.

甜品都唔錯呀, 細細件, 有空間試多D野食...

本來想點佢地最出名的crunch cake, 網上好評如朝, 但原來星期六無得賣, 失望.....

我地送左三本書仔比香香做生日禮物, 香香好似好鐘意咁播....

呢度坐得舒服, 而且無咁多貪心師奶驚死蝕底爭野食, 都算係星期六brunch 好選擇 ^^

同契女一家分道揚飆後, 繼續行IFC, 見到Godiva 有Chocolate Drink, 幾飽都

要飲....

真係好好味架!!!!!!!!!!!!!

米老鼠 @ Time Square

見到D friend post 左米老鼠exhibition 既相, 當然要去朝聖啦! 襯住星期五去開中環interview, 順便去銅鑼灣行下.

雖然D 設計好特別, 但我都係鐘意平時見開的米老鼠多D. 本來想買下精品, 但係隻表真係太貴啦, 而其他我都唔想買, 算啦...

終於揾到啦

好消息呀, 我終於揾到新工啦!

呢份工係agent 介紹的, 初初去到, 只覺得幫我的那位很求其, 應該都幫唔到我, 不過, 後來都有得in, 而面試的過程都幾愉快.

面試完第二日, 我正準備四川短宣的用品, 那公司問我與agent 是否熟落, 因為佢地想bypass 個agency.

從四川回來後便著手處理這件事, 知道佢地鬧翻了, 唯有自己處理, 總之最後得左啦!

感恩終於揾到份5-day work, 呢個係我好想的. 因為每個星期都會有時間處理私事. 另外, 我發覺這兩次轉工人工的加幅是我過去10年的總數, 實在超過我所想所求.

尋日都去左新公司簽employment letter 啦. 3/8 返工. 係時候....收拾心情上班去.

但都有好多隱憂. 例如他們可以這樣對外面的公司, 那麼對員工刻薄嗎? 看來我的上司都頗demanding. 還有, 我要帶四個下屬, 我應付得來嗎?

求神給我能力, 智慧, 忍耐等去面對新的工作...

藍莓鬆餅

星期日係大埔吉吉島買左包蛋糕粉, 聲稱只要加水攪勻就可以放入焗爐內, 係真唔係呀, 買包試下先....

今日去左新公司簽employment letter, 心情輕鬆晒, 既然下晝得閒, 一於試下..

材料:

1. 藍莓鬆餅粉一包

2. 水1/2杯

做法:

1. pre-heat 焗爐180oC 10分鐘, 備用

2. 將鬆餅粉倒入容器中, 然後加水, 攪勻 (我用打蛋器攪勻cake mix, 好似好D).

3. 將攪拌好的蛋糕漿倒入紙蛋糕模中, 每杯只fill 一半

4. 放入焗爐焗20-30分鐘, 至表面變為金黃色, 用牙籤插入蛋糕中沒有蛋糕黏在牙籤上即可.

我食左一件啦, 真係得wor, 味道還可以啦!

分享會

今日有第一場的四川探訪分享會, 對象係老公做導師果個團契的團友仔

姊妹YY 精心炮製左條片, 將上星期探訪的精華片段 + 雲上太陽background music. 我一路看, 回想上星期種種經歷, 一幕一幕出現係個腦度, 個刻有D想喊... T^T

原來我地離開四川之後, 又發生暴雨, 有人死傷, 呢個地方, 近年真係多災多難. 個刻好慚愧, 原來自己一離開就無再留意呢個地方的新聞, 我的愛心, 究竟有幾多?????

今晚返到屋企, 打開QQ, 發現我個組志願者的日誌, 佢提到係呢班香港朋友鼓勵下, 要繼續走呢條幫助別人的路..... 我記得, 係我寫左張卡比佢......

個刻覺得, 原來我都鼓勵到別人... 真係好滿足, 希望佢真係繼續行呢條路...., 另外, 我好想同佢講, 係聖經教我地"施比受更有福"架.....

http://www.youtube.com/watch?v=Srpz1-wA03Q

最受歡迎飲品

呢兩支係乜東東????

左邊個罐係菠蘿啤, n年前清遠短宣最受歡迎飲品

右邊個支係啤兒茶爽, 今次四川探訪最受歡迎飲品.....

每次飲呢兩支飲品, 就想起那次短宣.....

如果同時飲, 我會想起邊度呢????? 哈哈哈!!!!

四川探訪 - 仍有話講

返到香港幾日了, 但個心同個腦, 仍然賴低係四川.....

還記得初到步時, 見到這裡的人並無異樣, 心想, 我們還來這裡做甚麼, 他們還需要別人的幫助嗎? 他們會領情嗎? 那刻有點迷失.

事隔一年了, 雖然只係臨時住所, 但生活總算穩定下來, 也適應了安置點的生活. 而且大部分居民也簽了永久房屋分配協議, 心情自然輕鬆了. 人總要向前望, 係時候告別傷痛, 繼續走前面的路.

很認同當地社工的話, 我們來是陪他們走過一段艱難的日子..

這個旅程, 付出的不算多, 從他們身上得到的卻很豐富.

與居民的接觸, 感受到他們堅強, 積極, 樂觀, 對未來充滿期待, EQ 比我高得多. 居民很surprise 我們自費, 從老遠跑來這裡關心他們, 很樂意招待我們, 與我們聊天, 並講述當日所發生的事, 証明他們也走出傷痛.

記得競技遊戲當日接觸那位太太, 她認為這裡的孩子將來長大了, 會很有愛心, 也有顆感恩的心, 因為他們都受過別人的恩惠, 期待見到新一代的滿有愛心的孩子. 自願者們已踏出這一步了, 希望他們在服務的過程中, 更深體會施比受更為有福的道理.

很懷念與大家相處的一星期...

還有, 懷念四川的美食.... 麻辣火鍋, 麻婆豆腐, 一切辣辣的食物, 新鮮的蔬菜, 人人都愛上的... 啤兒茶爽.... 還有還有. 四川省美麗的風景.... 國寶熊貓 (可惜這次行程無機會親親大熊貓)

雖然衛生情況對我們來說是一大挑戰, 我還是希望再來, 只要不用沖冰水涼就可以了 :p

離別 - 四川探訪第六日

今日比前幾日都早起身, 因為要執好所有行李兼清理房間. 自願者以為我們要走, 七點幾就來到房間送別我們. 不過原來行程有變, 我地今朝會做遊客, 參觀都將堰水利工程, 午飯後才去成都.

食過番尋味, 所以今朝去番尋日個檔食早餐, 今次醒D啦, 記得攪勻碗底D 糖先好飲豆漿. 自願者想爭取時間同我地相處, 所以站在一邊等我地, 我覺得唔好意思....

食過早餐, 出發啦, 今次我地唔打的, 坐當地的電瓶車, 不過我個架就慢吞吞, 最後先到, 係附近行下, 用熊貓卡取入場劵就入場啦!

都江堰係一個千幾年前沿用至而家的水利工程, 係岷江上游, 主要有魚嘴 (將岷江四六分水, 六是外江, 會流入岷江, 四是內江, 流入成都灌溉農田), 飛沙堰 (排沙石) 和寶瓶口 (內江引水道)...

我地一路參觀, 來到一條吊橋, 橋上很多人, 好搖, 我部相機差D跌落河......

景點內有好多小食同特色禮品, 我地見到都努力買, 買, 買.....

本來打算在市內食lunch, 結果都係唔夠時間, 都係返去安置點食啦. 返到去, 大家盡最後努力買買買.... 麵條, 辣椒, 十字繡, 餅乾...... 重有最受歡迎飲品 - 啤兒茶爽, 大家買到成條街都無晒貨, 我最後行到廣場後面的超市先買到3支咋.....

自願者趁我地去遊覽個陣影左大頭貼紙相, 一人一張....

匆匆食過麵條, 返房取回行李, 就準備搭車出成都. 等車期間, 見到我曾探訪的家庭, 與他話別. 我地也圍著自願者, 送上一曲雲上太陽, 自願者唔捨得我地, 女孩子們哭了, 男孩嘛.... 借唱散紙為藉口行開了. 我們的姊妹YY 也哭了...

走的終需走, 上車了, 社工送我們到機場, 在車上大家睡著了, 而我沒有睡, 靜靜的回想過去六日的行程.

在機場看見喜歡的熊貓畫冊, 我又買了.....

夠鐘啦.... 上飛機啦..... 結束六日行程.....

2.5小時候飛機到達香港, 急不及待打電話比早我1小時到港的老公, 他已在行李輸送帶等我和短宣隊歸來....

同大隊食過Burger King, 就返屋企啦....

探訪震中映秀 - 四川探訪第五日

呢兩晚大家都累了, 所以睡得特別好, 我都一樣 ZZzzZZ...

今早發現新的早餐地點, 一於試下. 呢度供應玉米粥, 各式各樣的包. 我地點左好多款包, 饅頭無味, 豆沙包OK, 菜包太油膩, 土豆包最受歡迎, 豆漿少甜, 大家以為好好, 原來我地無攪勻就飲, 糖其實沉澱在碗底, 重以為係低糖豆漿添 =.=!

今日係最後一個節目 - 畫畫. 我們早已準備好稿件和顏料, 早上調較好顏色便開始畫, 孩子們很用心地畫, 呀! 我見到前天家訪時那個小男孩了. 那邊廂, 我們明天要離開了, 自願者爭取時間與我們交換通訊地址, 還向我們學些廣東話. 廣場另一邊, 成都中醫藥大學服務隊正在派發中成藥和一些健康資訊, 這是他們的強項呀! 大家各展所長, 為居民出點力... 經過兩小時後, 作品完成了. 好靚呀!

午飯後出發去映秀, 車子離開市區, 走上高速公路, 穿過隧道, 公路和隧道都修好了, 路很平, 隧道內標示著地震時斷裂的位置, 經過大半小時, 就見到青山河流, 不過白濛濛一片, 以及很多建築工程. 我們到達映秀了!

去到入口處, 原來禁止遊客進入, 我真的很失望, 不過司機大佬好醒, 知道前面有另一條路進入, 便駛到那邊, 然後行路進入映秀鎮.

下車地點是一條小村, 現在封著, 裡面是個廢墟, 我們走過一條殘舊的吊橋, 腳下水流急促的是岷江, 再看對面就是剛才落車那條村, 損毀相當嚴重, 根本無法再住了. 再向前走, 路是新修好的, 但仍見到一條大裂痕, 走著便到映秀大道, 見到仍然倒塌的樓房, 是整個樓房倒塌的. 然後, 我們到達漩口中學, 外面有個大招牌, 裡面有個大鐘, 很熟悉的, 呀! 這裡是舉行地震一週年紀念活動的場地. 但外面遊人只當旅遊點般參觀, 這裡還要保留作地震博物館, 但聽說樓房下仍有屍體呢! 旁邊還有個甚麼地震遺址遊覽圖, 喂!!!!!! 這是國殤呀, 不是用來遊覽, 也不是發死人財的機會呀! 為甚麼要保留下來讓在世的人不斷回憶傷痛????

我們繼續走, 走到山上, 有一個公墓, 墓地裡有一個接一個墓碑, 細看墓碑內容, 有丈夫的, 妻子的, 父母的, 孩子的, 特別是孩子, 年齡由四五歲至十一, 二歲, 有些還有相片, 孩子的笑容很純真, 燦爛, 可憐父母只能在相片中回憶了. 每個人看著, 心裡都很難過, 我在想, 這些墓碑的親人現在心情怎樣了, 生活如何呢?

墓地外有人在擺賣, 隊友覺得很諷刺, 但我覺得人總要活下去, 如果不是為生活, 誰願意把傷痛當商品出售呢?

再向山上走, 開始見到充滿生命力的情景, 有老人在耕種, 山上有婦孺和孩子居住, 他們用簡單的草蓆, 或是仍然完整的木板搭成房屋, 雖然有板房, 但這裡是他們的根, 或者他們不願離開死去的親人, 要留下來生活吧. 孩子們仍是純真可愛, 而大人的臉上再沒有傷痛的痕跡. 離開時有一位婆婆, 背著出生35日的BB 對我說: 「房子修好後你們要再來玩呀!!!!」多麼樂觀 ~~~

下山了, 上車後回憶每個親眼看見的畫面, 對我來說也很震撼, 到底地動山搖一刻發生甚麼事呢?

去程時司機說下午會落大雨, 但結果上車離開才落雨, 又係神的保守了 ^_^

回到安置點仍很早, 大家決定早點沖涼, 晚上仍有分享會, 也要收拾行李, 我雖然很不滿意這麼早沖涼, 但有熱水wor, 唯有乖乖地去... 嘩, 久遺了的熱水浴, 好舒服呀, 可以慢慢沖, 洗乾淨D.

今晚係在四川的最後晚餐, 我們點了酸辣魚, 水煮肉片, 都係四川名菜

社工也參與我們的分享會, 除了分享到映秀的體會, 也分享了信仰.

分享會完結要開始收拾行李, 快D執, 聽朝要更早起身呀!

廣東菜之夜 - 四川探訪第四日

今日早餐去街市旁邊的小麵檔食喬麥麵, 還有不知名的包, 麵條係即叫即做的, 不過麵質有點粗, 湯底太鹹, 唔好食, 而那個不知名的包太油膩, 裡面的餡料不多, 都係唔好食, 無下次啦!

早上繼續探訪, 今次是行程中最後一次家訪了, 要把握機會, 接觸更多家庭. 由於我的組員, 領隊T 的普通話不靈光, 而其餘兩個組員也少說話, 打開話題的任務就落在我身上, 不過我自己卻不善詞令, 經常都有dead air. 神也明白我的限制, 沒有遇到情緒特別激動的家庭, 不然真不知如何處理.

今日我們遇上趕著上班的婆婆, 快為人父的中學英文老師, 有高血壓的公公和照顧他的婆婆.... 走著走著, 來到東區和西區中間的小河, 每次經過這裡, 總被一個小花園吸引著, 花園種滿了太陽花, 向日葵. 今日我們遇上花園的主人 - 易婆婆.

和易婆婆拍個照後, 她邀請我們進她的家. 噢! 很整齊呀, 客廳, 飯廳, 睡房間隔分明, 是少數有心思的家庭. 易婆婆已退休, 最喜歡種植. 其他人選板房要出入方便, 她卻喜歡這裡, 因為有地方可以種植. 她向我們講述她在地震時的遭遇...

她說12/5/2008大約2:00pm, 有個朋友來找她出去, 她不去, 15分鐘後再來, 她也不去, 最後朋友硬拉她走, 好啦, 出去吧! 誰知出去後5分鐘就大地震了... 她自己安全, 可是畢生積畜 (約RMB40,000 - 50,000) 卻失去了, 而且三大櫃的衣服都沒有了. 她也承受不了這樣的打擊, 但她沒有放棄. 後來, 朋友送她各種家具, 衣服, 我們也讚她人緣真好. 她也去做自願者, 因為她認為別人可以做的, 自己也可以. 我們很欣賞, 很佩服她, 她的故事對我們是很大的鼓舞啊~~

中午在平日食麵的地方食飯, 今日有期待已久的麻婆豆腐, 正呀! 食飯時我們遇上從成都中醫藥大學的社會服務隊, 後來來個大合照, 大家都是為同一目的而來嘛!

飯後休息一會就去街市買送, 準備晚上的廣東菜之夜. 大夥兒買雞, 魚, 肉, 湯料... 今晚一定很豐富 ^_^. 買好送, 就到我們組的自願者家開始煮飯, 由領隊T親自下廚, 其他組員就和麻麻足波子棋, 麻麻好利害呀, 贏了很多次. 領隊T完成後也和爸爸, 細佬玩啤牌. 至於我... 我就看他們玩, 做後期的工作, 也自得其樂.

原定五點半開餐, 但都搞到六點半先齊人. 嘩! 好多野食, 好豐富呀! 大家都食得好開心. 隔離鄰舍送來泡菜, 我們也和他們分享食物, 這情景多麼和諧美好. 今日係其中一位自願者的生日, 社工買了蛋糕和她慶祝, 我們唱兩文三語生日歌, 一切原是美好, 不過, 生日會最後演變為暴力事件, 蛋糕被定個清光, 大家都中招, 人人有分, 永不落空. wakakaka....

回到房間, 和社工交談一會, 她說想到理髮店洗頭, 好好好, 我都正有此意, 於是拉大隊去洗頭, 嘩, 真係好舒服呀! 盛惠每位RMB5. 社工也燒了半桶熱水, 好讓開始覺感冒的姊妹有點熱水沖涼, 謝謝她細心照顧. 我雖受惠一點點熱水, 但仍然頂硬上.... 其實, 我也有點感冒了..

按 Schedule 行事 - 四川探訪第三日

雖然訓得唔好, 不過起身都OK 啦...

今朝早餐轉轉口味, 食包, 飲豆漿. 豆漿倒在一長條的膠袋內, 第一次見. 包都好好味呀. 另一部分去食喬麥麵, 有人話唔好食, 有機會試下先.

今朝第一個節目係音樂會, 我地準備左好多歌同大家唱, 開頭D歌大家唔係好熟, 氣氛一般, 但後來有D集體跳舞等等, 大家都好投入, 玩得好high, 雖然好多歌我都係岩岩學識, 我自己都好enjoy. 姊妹YY 係搞氣氛呢方面真係好有恩賜, 令大家玩得好開心.

午飯後有一段自由時間, 我就同D roommate 玩自拍, 然後預備下晝去幼稚園教小朋友做手工. 其他人就玩下啤牌.....

下晝去到幼稚園教手工, 我地準備左手工紙同大家摺心心, 同埋穿珠仔, 點知其中一班的小朋友年紀太細, 不太適宜穿珠仔, 只好摺紙. 那刻我有D失望, 覺得好似準備得唔好, 沒有考慮到小朋友的年紀去設計手工.... 不過, 好多謝那一班的隊友, 她們想到兩個摺紙手工給小朋友. 多謝她們的急才

至於我地呢班就可以穿珠仔, 我地用一張大紙教她們摺心心, 係老師的幫忙下, 小朋友好聽話, 好快就完成了. 不過穿珠仔個陣小朋友就不受控制, 好彩有老師控制場面, 也有自願者及我們的隊友幫手, 大家互相配搭事奉, 實在美好. 整個手工班一個鐘頭就完成...

時間尚早, 開始探訪啦! 今日我地去返尋日去過, 不過傾得唔夠喉, 又或者因為唔識聽四川話而無去的地方. 我們所接觸的家庭都很熱情的招待我們, 有時更阻住人地食飯, 真係唔好意思.

雨越下越大, 我們又來到一個家庭, 爺爺講述地震時的情景, 當時他抱著1.5歲的小孫女, 埋在瓦礫下, 4小時後獲救, 小孫女無事, 爺爺的腳要截肢, 不過到成都經過一輪治療, 也不需要了. 現在爺爺也四肢健全... 聽到這些幸運的故事, 很為他們高興, 好像與他們一起經歷逃出生天的一刻, 一家人齊齊整整生活下去.

今晚的雨真的很大, 安置點內開始水浸, 走回房間大家的鞋都濕了. 中午曾聽說明天可以去汶川 , 可是這麼大雨, 往汶川的路更危險, 居民也叫我們不要去, 所以, 最後無奈地取消明天的行程了.

下雨天, 氣溫更低, 今晚又要沖冰水涼, 經過兩日, 大家續漸適應這裡的生活, 不過冰水浴還是很辛苦. 但今晚, 經歷了多次神的保守:

1. 當我們晚飯後回房間, 發覺巷外大水浸, 但大家沖完涼要經此路回房間, 沖涼時大家都擔心會病了, 也擔心要經過水浸的地方才能回房間, 可是, 當我們沖完涼後, 巷外的水退了, 路容易走了, 大家都讚美神的恩典.

2. 晚上我會上洗手間, 前兩日都有姊妹陪我, 但今晚這麼大雨, 我也不好意思再叫醒他們, 但房外沒有燈, 黑得心驚驚, 只好祈禱, 求神保守. 結果, 半夜醒來, 竟有人也上洗手間, 那我就有個伴了. 感謝神, 他真體貼.

四圍行... 四川探訪第二日

一覺醒來, 精神爽利, 不過大家變晒四川特產 - 熊貓.... wakakaka

起身第一件事就要爭.... 兩個洗手盆, N 個人一齊梳洗, 好彩大家都好禮讓. 這裡沖涼, 去廁所和梳洗都好唔方便呀, 因為房內沒有獨立浴室, 所有都是公用的. 今日重會停水, 停電添...... 點算好????

今早早餐就係出面的麵檔食陽春麵, 最重要提醒檔主不要放辣椒. 不過我就放些在自己那碗, 真係好好味呀!

食過早餐, 開始今日的活動, 首先參觀整個安置點, 安置點分為東, 西兩部分, 由黨四個支部管理. 先去到區內唯一幼稚園, 小朋友跟住老師跳舞, 好得意, 再向前行見到種植了好多蔬菜. 這些都是居民的傑作, 真真不錯

10:30am 要開始第一個節目 - 競技遊戲. 由於停電沒有廣播, 來參加的小朋為數不多, 唔緊要啦, 見大家都玩得好開心wor. 而我, 就全程同最後兩位參加者的阿媽傾計, 了解她的生活. 聽她說父親在地震中喪生了, 她們一家都安全, 而且也適應了這裡的生活.... 雖然不認識她們, 得知一切安好, 也覺得安心了.

午飯後我們到市區走走, 感受一下大地震的破壞, 安置點後面有一個大帳逢, 是由一個美國的基金在這裡的工作. 當中有位來自香港的F.5 學生, 一個人來到這裡教小朋友, 很難得, 也實在很多人關愛這個地方. 跟住就去到市區, 市面上大致正常, 相信大部分也拆除了, 中度損毀的就修補一下便繼續使用. 但仍見到一座大廈的外牆在高空半天吊, 好危險. 最後去到一間小學的遺址, 眼見只有藍球架沒有損毀, 其他的都拆除了, 變為平地, 後面的老師辦公室倒塌了一半.... 據說這裡有200 (有說800)學生喪命....... T_T

參觀後回到安置點, 大家心情有點沉重, 畢竟大家也親眼看到這次地震的威力和所受到的破壞. 跟住開始探訪, 這是大家最期待的工作, 我們探訪了多個家庭, 得知她們一切安好, 大家坐在小巷內閒話家常, 了解她們的生活, 看到她們樂觀的笑容, 聽他們講述當時的情況, 我相信他們已走出難過和傷痛了. 實在令人鼓舞.

今晚機構方面帶我們品嘗四川地道食品 - 麻辣火鍋. wow... wow.. wow.., 可惜湯底係改良版, 但都係好好味 X 1,000,000

今晚有點涼, 大家都要穿上長袖衫, 食完麻辣火鍋熱辣辣, 沖冰水涼都無有怕啦! 唔係wor, 大家仍然大叫, 中途有兩位當地居民走進來要沖涼, 她說尋晚聽到我地大叫, 以為發生甚麼事..... 嘻嘻嘻, 唔好意思呀, 我地真係太嘈了......

大家尋晚訓得唔好, 所以今晚大家都好好訓, 又輪到我做熊貓了.... zzZZzzZZ

出發啦! Go Go Go!!!! 四川探訪第一日

訓左兩粒鐘就要起身, 帶住一對熊貓眼, 出發去機場 (係呀, 熊貓要返鄉下四川啦)

到達機場 check in, 終於放下很重的背囊. 傳道人特地來送機並帶來美味蛋糕, 實在謝謝她的關心.

我們所乘搭的飛機好細, 坐下會頂腳, 很辛苦. 飛機餐內那豆腐雞肉鹹得很...2.5小時後終於到達成都.... 取過行李, 即刻搭車去都江堰..... 原來只需1個鐘就到達啦!

到達後第一件事就係分配房間, 我地14人共3間房, 房內連床都唔夠, 所以接待我們的當地社工四處為我們張羅各項床上用品, 然後打掃, 但我們這間房是最懶惰的, 因為我們只作簡單的掃地, 其他甚麼也不做了. 反正打掃了也覺得污糟, 算了吧, 括出去吧!

今晚晚餐很豐富, 因為要和安置點的人員食飯, 我就和牧師, 當地人員等等坐在一起, 哎呀, 要正正經經地食飯啦. 四川菜味道濃, 較鹹, 有點辣, 不過, 正合我口味. 好好味呀!

一如國內飯局作風, 隊酒是少不免的, 牧師和C都飲左唔少杯. 而且點了很多菜, 大家都食唔晒, 覺得好浪費. 不過也明白的, 這是國內的文化, 畢竟要給給他們面子, 保持良好關係, 好讓在當地的事工順順利利. 而且那些人員(都是黨員來的) 都會「牧師前, 牧師後」專稱, 機構與安置點的關係看來很不錯呢!

回到安置點, 繼續打點房間, briefing 等, 然後沖涼. 沖涼簡直是一大挑戰. 因為沖涼的水是冰水, 而且係open bathroom, 大家都好唔習慣, 一面沖, 一面we 嘩鬼尖叫........ wakakaka...

半夜真係好涼, 好彩聽當地社工話, 每人都取了棉胎. 房間內有很多蚊, 原來半夜大家都起床擦蚊膏, 貼蚊貼... 搞到無覺好訓..... 而我呢???? 前兩晚只睡了兩個鐘, 所以我..... 訓到成隻豬咁, 乜都唔知道啦. wakakakaka.....

出發在即

唔經唔覺又到七月頭, 四川地震災區探訪之旅出發在即

好期待, 但又好擔心

期待的是.... 希望看看當地的情況, 更多認識地震對當地的影響. 擔心的是.... 能否適應當地的環境, 和隊員的相處....

還有天災: 這個星期初發生5.6級餘震, 當地日日都落雨, 天雨路滑, 在高速公路上行車安全嗎?

這幾天都忙於買物資, 開始pack 行李

聽日重有最後training.

希望整個行程安全, 順利, 大家在這次行程中都有得著