呢隻熊貓好淒涼

無聊地上網找些熊貓的圖片, 竟在一國內討論區發現一段令人心酸的新聞, 內容指深圳動物園內的熊貓永巴沒有適當的照顧, 懷疑沒給他食飽, 要靠與遊人合照, 才可換得一塊蘋果. 此段留言引起國內網民很大的迴響. 不過我覺得內容有點煽情, 於是找找香港的報導. 原來, 香港報章在年初也有報導這段新聞

http://the-sun.on.cc/cgi-bin/hotnews2.cgi?a=news&b=20090108&c=20090108013325_0000.html

熊貓永巴現年26歲, 相等於人類百歲高齡, 翻看資料, 永巴在繁殖小熊貓方面立下不少汗馬功勞. 如此將一個老人家當成搖錢樹, 定會被人責罵, 更何況熊貓是國寶呢? 做這些事的人何時才清醒些, 文明些呢?

但繼續看新聞, 永巴因腳傷, 四月中已回到四川療傷, 希望牠有適當的照顧, 有飽飯食啦! 不知牠的情況如何呢?

四川地震災區探訪 - 第三次集訓

今日係第三次集訓啦, 傳道T 請來其他堂會的準宣教士為我們講解宣教工作

說真的, 對我來說, 宣教是遙不可及的事, 因為自己實在無負擔. 而且有些資料我都有概念, 就當是溫固知新吧!

機票方面總算落實了, 由於內陸機票的價格和從香港起飛的價格相近, 最後大隊將會從香港出發. 不過, 成本增加了, 雖然對自己的財政狀況總有點壓力, 不過, 我仍相信神會供應的. 我心裡最擔心還是那些仍是學生的隊員, 希望教會方面能幫助他們吧!

活動方面也有些頭緒, 感謝組員的努力, 找到不少資料.

但最失望的是.... 取消了參觀熊貓基地的行程, 唔制呀! 唔制呀! 無計啦, 因為主辦方面怕H1N1而取消是次行程 Oh! 大熊貓, I miss you. 只好在海洋公園見了.

感概‧無奈

今日突然間回想過去10年的職場生活, 感觸良多

過去10年轉工次數不多, 每份工都好stable. 而且係過去咁多次揾工過程, 都係好順利的, 都係對自己的career path 有利的, 所以, 一直以來我都對自己份靚靚CV引以為傲.

不過, 可能對職位的要求不同了, 我期望可以找到更senior 的工作崗位, 但原來我過去的經驗都好像不獲認同, 更甚的是, 我發覺原來一直以來, 我所付出的和得到的都不成正比. 原來那些令我引以為傲的, 其實不外如是. 再看看身邊的朋友, 或許有些已經比我更成功. 那刻, 我心裡很難受.

最近找工作更深體會這困難, 是目前的經濟環境影響嗎? 那一定是的, 但是否自己期望過高, 也許需要調低自己的期望嗎? 還是自己真的技不如人呢? 下一份工, 仍會面對這麼不公平的待遇嗎? 我只想憑努力工作賺取金錢, 希望獲得合理的待遇, 難道這是奢侈的想法嗎?

和老公分享心裡的難處, 老公建議一起祈禱, 相信天父會為我們預備一切, 正如他過去給我們的一切恩典.

期待著天父的作為

深圳飲飲食食行行街吹吹海風之旅

27/5 - 28/5 上深圳 hea 下, 地點係深圳大梅沙

此行本來只有4人, 後來再加4人, 一行4 對夫婦, 好不熱鬧, 係沙頭角已經遇上遲出發的一pair, 點知大家同時到達酒店....

酒店房間有4個主題, 酒店方面每個主題安排一間比我地, 一次過看晒四個示範單位.


安頓好, 開始第一個行程... 去大梅沙沙灘. 不過太大風, 重落雨添, 逗留一陣即閃. 海灘上有一座願望塔, 還有些騎呢雕像, 統統與海灘格格不入...


離開海灘, 去超市買下食物, 就向鹽田海濱進發, 去個度做乜? 食海鮮也 ^^

姊妹SM一早做好功課, 去到目標酒樓, 大家努力揀海鮮, 好豐富, 好新鮮的海鮮餐呀!!! 埋單只係RMB800, 非常抵食, 老公食到 lam lam 俐, 重話 I will be back.....

酒樓外面就係鹽田港, 即係同香港貨櫃碼頭有得fight 的鹽田港


食完飯, 去超市入貨, 返酒店開始餘興節目, 姊妹SM 帶來Pictionary同大家玩, 跟住就追四奶奶. 今晚重有曼聯 vs. 巴塞. 老公準備今晚捧場, 點知唔夠15分鐘就去左揾周公子 ZZzzZZzz...

第二朝訓到10點先起身, 匆匆梳洗, 讀經. 細心的姊妹SM準備好資料, 大隊11點有唱詩靈修時間. 食埋靈糧, 開始第二日行程. 第一站就係去對面Sheraton 飲早茶, 豪番餐. 酒店大堂好靚, 不過冷氣不足 (一貫大陸酒店特色), 地毯上重有污跡. 一間開業只有兩年的外資五星級酒店, 實在不該如此...


大家點了好多點心, 不過點心實在太"精緻", 大家都唔飽. 所以飲完茶去對面露天攤檔繼續食食食, 食羊肉串 + 重慶酸辣粉

我最怕羊肉味, 不過這種清真羊肉, 所用的香料已蓋過羊肉味, OK OK.


至於酸辣粉, 好多年前食過, 仍懷念那種酸辣味, 我買了一碗, 老公只食了一條.... 真係好辣, 但好好味.


今日係端午節, 係香港公眾假期, 亦都係中國公眾假期, 而且天氣比尋日好, 所以, 很多人湧到沙灘, 街上很多人. 從公車遠望海灘, 只見一片黑色人頭......

公車到達深圳市, 開始shopping, 大家目標一致 -- 書城. 收穫很豐富, 包括我們的古典音樂CD, 姊妹K的蛋糕麵包食譜, 還有買給晴晴的迷宮書, 公主書.....

Shopping 完畢, 就係最後一站, 小肥羊, 嘩! 人頭湧湧, 不過我地只係等左半個鐘就有位, 大家不停點火鍋料, 再加小肥羊三寶 - 黃金大包, 燒羊排, 羊肉串, 大家好飽, 盛惠每人RMB78, 好好好抵, 係香港食一定唔得.

呢個旅程, 大家都好盡興, 帶著一身"小肥羊味", 向落馬州進發, 踏上歸途.

博物館

今日又有interview 啦! 地點係上環, 就係上環文娛中心對面

呢間公司雖然唔係好出名, 但係我以前都聽過個大名架, 而且都係做番我以前的工作, 所以, 都抱著一D期望去的.

但係一去到, 真係嚇親我......

嘩! office 固然唔係平時見到的那種靚靚大堂, 呢個都算啦, 上到去, 走廊黑孟孟. 入到去重好笑, 係70年代的office 裝修, 好殘舊. 檯仍然係不銹鋼檯, 而且生晒銹架啦, 又唔見staff 檯面有電腦. 嘩! 21世紀啦! 連呢D基本通訊工具都無嗎? 連插蘇都係圓腳插蘇, 乜唔係一早已經轉左方腳插蘇?

呢個設計, 令我想起細個老豆office個setting. 而家再看, 簡直覺得自己走進香港商業社會博物館.

Interview 的過程中, 我都覺得呢份工有發展的機會, 不過, 如此setting, 這間公司能與現代社會銜接嗎?

今日又見agent

今日下晝去agency interview.

其實個interview 的內容都好standard. 本來都覺得OK, 不過後來的對話就令我一頭霧水.

個agency 覺得我先辭職, 然後慢慢搵工, 原因係想休息下, 唔想請咁多假, 呢個reason 好多大公司唔能夠接受, 因為D 大公司如果搵到岩的candidate, 佢地唔介意等, 或者buy out 個contract. 要放假, 大把機會啦, 所以覺得我唔應該辭左份工.
大老呀, 人地肯等三四個月個D工, 都係好senior 的工種, 邊到我做呀...

佢又叫我唔好轉工轉得咁多...
下.. 我每三年轉一次 (除左最近呢分), 咁都叫多.

覺得我有十年工作經驗, 但呢個人工, 似乎偏低, 佢話有D大公司的ME都有呢個pay...
大老, 我都想高D, 你都識話我做開local 公司啦, 個pay 邊比得上D MNC....

不過有D野我都認同的.
1. local 公司比個好勁的title, 但可能係D大公司都唔係好senior
2. 而家個job market 好competitive, 公司揀人揀得好仔細
3. 唔好介意係local 公司, 搵到去住馬先

或者, 呢D都係我需要注意的地方. 但係, 前面的路我要點行呢? 係唔係有D堅持要放低, 要調較下自己的心態呢?

呢幾日重有interviews. 唔知會點呢? 無論係公司direct 見我定係agency, 都係件好事, 起碼我個profile 都係好的. 不過, 呢幾日就要頻頻撲撲啦!

如何愛神更多

今晚同團契弟兄姊妹去聽研經講座, 題目係如何經歷神並愛神更深, 呢個係一個老生常談的題目.

講員引用詩篇103: 1-18, 第二節提到: 我的心呀, 你要稱謝耶和華, 不可忘記他的恩惠. 很多時
當信主年日久了, 無錯知識上我們認識神, 或許我們也經歷了他的恩惠, 可是我們往往停留在知識層面上, 沒有內在的更新, 慢慢地, 我們忘記了他恩情, 也失卻了愛神的心.

講員也提供了實際的方法讓自己愛神更深, 如詩篇第一篇所講, 要晝夜思想神的律法, 默想神的話語, 默想就是讓神向自己內心講話, 將他的說話充滿你心, 讓自己更深明白神對人的愛, 然後認罪, 悔改, 經歷神赦罪的恩典......

聽完講員所講, 靜心一想, 其實要愛神更多, 離不開靈修, 讀經, 祈禱, 擺上時間親近神. 這些都是基督徒信仰基本功呀!

但最精彩的, 還是下半部份的問答時間......

其中有位姊妹問, 香港人好忙, 我該如何做才可親近神呢?

講員也答得妙, 他說紐約人的生活也一樣, 都係workaholic, 他的工作也忙碌, 所以, 他會將分開時段親近神, 當有空檔時, 便會親近神.

姊妹再問, 她連一個小時空閒時間都沒有, 那怎麼辦呢?

講員答得更妙, 他舉了自己的例子, 他說希望和太太一起禱告, 但結果經常以工作忙碌為理由, 遲遲未做到, 所以他太太常常怪他說謊. 他認為只要是你看重的, 你一定會做得到.

我和老公都很認同他的答案, 也認同講員引用自己的實例繞個圈勸戒姊沒這是個人priority , 決心和是否願意付代價的問題.

另一位姊妹問如何面對神不回答自己的祈禱....

講員再引用自己的實例, 他23歲那年和一女孩子約會, 他求神讓這女孩的心向著他. 但講員並沒有與這女孩結婚, 最後, 他遇到現在的太太..... 神沒有聽他禱告嗎? 看來, 神並沒有聽他禱告. 但從另一角度來看, 神已回應了他的禱告, 因他遇到更好的女孩並與他同走人生路. 所以講員認為凡事也可從另一角度去理解.

這兩位姊妹的問題讓我明白, 香港的信徒也受著香港文化所影響, 最好不用付代價就有速成法去經歷神. 禱告後最好得到自己想要的結果....

但是, 不要五十步笑一百步, 自己何嘗不是犯上相同的錯誤?

想起最近悠長假期在家中, 成日都話無時間做運動, 放假前下定決心買左塊扭扭版, 可是兩個星期以來都無用過. 我知道運動對自己是非常重要, 那怕只是15分鐘. 想起舊同事說用看電視的時間做簡單運動, 何不試試? 所以我便用看"真情"的時間來做運動.

其實這決心也可應用在屬靈層面上, 盼望自己也有這決心與神親近.

四川地震災區探訪 - 淆底

17/5

今日係第二次集訓, 最主要係傾下個幾日會做乜野. 大家都比左好多意見, 不過, 好多都係玩遊戲. 死啦, 呢樣野我真係唔掂架, 我最怕玩集體遊戲. 奈何其他年輕團友仔就好興奮..... 今次真係淆底, 看來我都真係年紀大啦, 開始同呢班青春無敵的年輕團友仔有代溝添....

好彩領隊T 都建議要預備靜態D的活動, 大家都建議做香包, 串珠仔, 織手繩, 雖然樣樣我都唔識, 不過算係最唔抗拒的活動啦!

同佢地相處裡面, 當領隊想大家腦震盪, 比D suggestion 個陣, 大家都會想到遊戲, 好少提出一D技能上的活動, 係大家謙, 定係真係無乜idea, 因為生活圈子就係電腦, 打機????

呢個trip, 對我來講都係個好大的挑戰, 隨著人長大, 見識多左, 對生活環境的要求都唔同左, 我願意適應當地生活環境嗎? 與呢班團友仔相處得來嗎???? 開始feel 到有壓力啦!

要好好為自己祈禱啦!

伴娘出嫁了

16/5

今日晨早就要起身, 梗係啦, 我當日的好伴娘W 今日出嫁了. 真係等左呢一日好耐啦!

去到新娘屋企, 個MUA 遲到, 而且慢吞吞, 不過都好, 我地用左個幾鐘頭同班兄弟玩, 班兄弟都好合作, 佢地玩得"開心", 我地看得更開心...... 姊妹B 笑到肚都巒..... 哈哈哈, 玩左咁耐, 個MUA 真係好唔掂, 搞到我地差D無其他遊戲dum 波鐘

中午食飯都好搞笑, 聽到阿sir C吹水講下佢點管住個女, 同埋醫生點樣鬆下"手筋" , 又令大家笑到肚痛

好快就去到教堂行禮部分, 見到W 行上紅地毯, 真係好感動, 因為多年好友終於找到自己的幸福. 婚禮場地佈置果然貫切佢地上山下海的性格. 不過, 都係個句, 個MUA 慢吞吞, 牧師三催四請都未搞點, 搞到遲左10分鐘先開始, 好睬大家都好合作, 整個程序先無over run 咋.

夜晚先係高潮, 為左keep 得D時間好D, 姊妹團發揮團結精神, 一個幫新娘換衫, 一個摺衫, 其他就戴金器, 等呢棵聖誕樹快D出去做人肉佈景板. 而且大家係新娘房內玩得好開心好癲, 重有so sexy 的Auntie, wow wow.......

返到屋企, 仍然好回味呢個婚禮, 重係好high, 搞到個晚訓得唔好.... 正傻婆....

In conclusion
1. 兄弟玩得, 掂呀!
2. 姊妹合拍, 勁呀!
3. 一對新人, 索呀!
4. MUA....... 完全唔掂..........

最後, MK 你唔準蝦W 架, 如果唔係, 大把人會幫W出頭..... 祝百年好合, 永結同心!

第一次煮咖喱

心思思想用埋舊年係Food Expo 買的咖喱粉, 今日決定試下.....

明知今日全日都要interview, 無時間去街市, 所以尋日已經買好所有材料.

材料:
雞扒兩大塊 (約1磅半)
咖喱粉一包
薯仔兩個
洋蔥半個

做法:
1. 雞扒去皮, 切件 (鬼叫我唔識斬雞, 唯有用雞扒代替)
2. 用糖, 鹽, 豉油, 胡椒粉, 酒醃下D雞件, 時間約為30分鐘
3. 切好薯仔, 洋蔥
4. 爆香洋蔥, 再落雞塊, 煮好放在碟上
5. 爆香咖喱粉, 加四碗水, 水滾後加入薯仔, 洋蔥, 雞件同埋椰漿
6. 煮至薯仔煮透, 約20-30分鐘




我發現30分鐘後, 個咖喱汁變得"結撻撻" 而且呢個牌子的味道好似麻麻地..... 我都係鐘意"新加坡咖喱汁" 罐頭.




第一次煮, 無煮"農", 都OK 啦, 老公都覺得OK, 算啦! 下次再改良下先.

兩個interview

今日竟然有兩個interview, 所以今日全日都頻頻撲撲....

朝早去九龍灣, 係一間有百幾年歷史的中藥製造商, 不過亦都出名老闆難頂. 都係抱住一in 無妨的心態去.

出師未捷, 第一步就衰遲到...

Interview 果陣, 我覺得對方想收風多過in 我, 重問我關於前公司轟動一時的炒人事件.

由於呢間公司係九龍灣, in 完就去左德福IKEA 行下, 買下野... 我終於買左..... 好好味的瑞典肉丸急凍版啦! 好野, 返屋企都有得食 ^^




下晝就去葵涌, 係另外一個前competitor, 地點都幾"隔涉", 方原10哩都無餐廳, 而且離地鐵站好遠添. 心想, 係唔係咁大牌呀.... 上到去, 規模就真係麻麻. 心裡真係幾唔鐘意.

好彩個interviewer 都算幾nice, 開頭問D問題都算正路, 但係佢都問我結左婚, 會唔會考慮生BB, 我都老實答佢 "會". 又問我先生會唔會介意我OT, 我都一一老實答. 雖然老公明白我工作性質, 但太多OT都會介意的. 然後對方都無解釋下份工, 又無問下我有無問題, 就話一星期內通知我有無2nd in.

離開個間公司, 就去佐敦取改好的飲衫, 跟住返屋企.

返到屋企定下神想下, 如果OT好夜, 其實都幾危險, 因為方原10哩除左對面的大廈同青山公路的車外, 周圍都無人架啦! 看來請我都真係要考慮清楚.

唉! 其實呢個時勢, 有工比你in 其實都好難得, 我一直都希望搵D外資公司, 又要做manager 的position, 我係唔係要求過高呢? 呢兩者可唔可以同時出現呢? 可以的話, 我又應付得來嗎? 呢幾個問題, 我真係搞唔清楚.....

擔心

悠長假期已經過左一個星期, 最開心就係星期六, 日, 因為老公都放假, 可以出去玩下, 食下野. 但到星期一, 大家都返晒工, 我就覺得好悶啦!

每朝早起身都會瀏覽各大搵工網站, 唉! 適合的工種真係少至有少, 而且重無乜interview添, 個心..... 開始有D驚........

尋日係教會同傳道人WL傾計, 佢覺得我離職後成個人都開心晒, 精神都好左. 梗係啦! 離開那個鬼地方, 每日又訓得夠, 真係人都靚D. 不過佢都提醒我, 今次為工作祈禱真係醒目D. 要求神比份可以留耐D既工作比我, 讓祂帶領我到合適的地方.

知道啦! 知道啦!

雖然離開上一份工只係個幾星期, 但係, 我真係掛住返工的日子......., 希望..... 快D搵到岩既工啦!

四川地震災區探訪 - 前傳

重有1日, 就係四川大地震一週年. 近日新聞都好多關於災區最新情況, 看著這些新聞, 心情仍很沉重.

一直以來都好想去災區, 看看有甚麼可以做得到, 可是我甚麼都唔識, 舊年去只會阻住善後工作. 這個意念一直都在我心中, 直至今年又劈炮唔撈, 適逢教會竟有這樣的探訪, 不過是次活動是青少年部的, 唔知受唔受埋我呢個超齡團友玩呢? 唔理啦, 叫老公問下先. 點知, 竟然OK. 就係咁, 我就參加左呢個探訪團啦!

其實今次都唔係第一次去四川啦! 上次已經係5年前的事, 而且上次係去九寨溝旅遊. 行程, 節目, 食住都一流. 但今次就唔同啦!

尋日開始第一次集訓, 我終於知道目的地係都江堰, 領隊KC亦講解左當地的情況. 雖然我地做的真係好有限, 不過都會係個好好的體驗. 而且真係可以直接知道當地的真實情況, 呢個悠長假期, 變得好有意思啦!

最困難的, 係要適應當地的生活, 特別係廁所, 原來廁所同沖涼房內都係無門, (放心, 男女係分開的, 只係廁所內就無門啦) 所以, 便便同埋沖涼都會見到大家, 所以, 大家都好擔心. 而且四川的食物偏辣, 我想我應該OK的, 不過, 有D團友仔都擔心食唔慣....

看來呢次行程, 比起我8年前清遠農村探訪 + 生活體驗更辛苦...

悠長假期

悠長假期已經開始左一個星期, 呢個星期一D都唔得閒架, 以下係我過去一星期的工作

Interview, 做家務, 搵工, 同阿爸阿媽飲茶, 去bank, 添置家庭用品, 買送, 重要去W 的婚禮rehersal .........

好似好忙好充實, 但我都係掛住office 的生活, 我想, 我都係鐘意做野多D, 雖然有時都好受氣, 好大壓力, 我都係希望快D重返office.

不過, 打開米報, job market 情況仍然唔理想, 我都唔知點算....., 尋日偶然發現兩份幾岩的工, 係我以前公司D competitor, 重係HK base 添. 咁都要apply 架啦! 雖然我心有不甘

悠長假期, 最大好處就係可以訓到皇朝百晏先起身, 正呀!

退下火線

30/4

雖然遞信一星期就可以離開, 但呢個星期我都覺得好難捱, 我真係好想即刻離開. 如我所料, 陸續搵到好多錯處. 有時都激到同事N 死死下. 不過, 我只係盡力而為, 幫到的, 做到的, 我都幫手.

終於到30/4啦, 今日唔使派散水餅, 因為要就同事K & P 今日出trip, 所以尋日派左啦! 今日全日坐係office 上下網, 執下野, 解答同事N 的問題, 同埋準備handover list 比佢地. 下晝做埋handover, 我就功成身退啦!

行出大門口, 成身鬆晒, 吸啖空氣都清新D!