支持愛心粥檔

早排生果日報報導愛民村冬菇亭粥檔每日都派粥比老人家, 今日同老公去愛民村食粥支持下. 不過上去之前, 我地食個茶餐打底先. 點知, 就係屋企樓下撞番十幾年無見, 小學一齊係教會長大, 後來做埋中學同學的姊妹Fiona. 十幾年無見, 當街當巷都要來個抱抱……

老公成日心思思想去愛民村, 因為d blog 友話商場裡面賣高達模型平d. 趁個茶餐未落格, 去行下個商場先. 商場內有兩間模型舖, 老公兩間都行勻晒, 果然比大埔平, 佢又心思思想買. 唉! 行下先啦, 食完粥再算.

我地又行下商場外其他小店, 竟然發現呢兩間舖頭




哦! 有人做秘撈….. 我重做左老闆娘添……

都係早d去食粥, 費時去到人地收檔, 粥檔係冬菇亭後面部分, 面向君逸山, 食粥的人唔多, 好多都係街坊買完菜坐低食啖粥. 我地叫左艇仔粥, 炸兩同埋油炸鬼, 個粥都幾綿, 而且幾多料, 油炸鬼雖然凍晒, 但都係脆的. 牆上貼左紙“長者免費早餐”, 另外記錄左善心人的捐款, 我地total 食左$21. 不過同檯有個師奶好似無看報紙, 竟然問老闆 “乜你派粥o羊?” =_=”



食完粥行過麵包舖, 見到好多細個好鐘意食的西餅, 忍唔住買左幾個



最後, 老公都係帶左佢心愛的高達模型返屋企……… 唉!