歐洲之旅 – 巴黎: 塞納河船河, 聖心教堂, 主日崇拜, 凱旋門

12/10 (星期日)

今早出門口個陣, 酒店職員好緊張問我地房間內有無貴重物件, 又問我地買左LV未, 佢請我地將貴重物件交比佢地保管, 看來所有人都知道尋日發生的事. 其實我地都擔心有人比人訓話完之後, 我地房間的物件會比人再破壞, 所以我地都將房裡面的物件收好. 而佢地都係唔想再出問題, 所以都好小心處理我地的貴重物品, 我都將所買的LV 用膠紙封好暫時交比佢地保管.

今朝一早按原定計劃去塞納河遊船河. 老公係香港已經上網買左平飛, 原價每位Euro 11, 網上價Euro 7. 我地搭11:15am 的船仔, 原來好多遊客都來排隊搭船, 上到船就揾個有利位置坐低. 今日係星期日, 可能尋晚d 人wet 完未訓醒啦, 所以條街好少人. 而且今日陽光普照, 最岩去遊船河, 不過太陽就有d刺眼. 船程約1小時, 經過好多巴黎著名的旅遊點, 如羅浮宮, 協和廣場, 奧塞博物館, 聖母院, 也會經過多條橋如亞歷山大三世橋. 途中見到好多人跑緊步, 好健康wor! 船仔都會經過艾菲爾鐵塔, 我同老公話好想影下鐵塔的日景, 今次就順便去埋, 唔使行多次啦! 整個船程都好舒服, 晒下太陽, 吹下河風. 唔錯, 唔錯, 值得推介. 只係老公個感冒無乜新進展, 一路遊船河, 一路包雲吞. 連船上職員影個d相, 落船係番個碼頭賣, 老公都話自己個樣太病, 所以唔買啦! 落左船, 就即刻去聖心教堂.





聖心教堂係小山丘上, 所以出左地鐵行幾步, 抬頭就會見到, 我地向住教堂方向行, 好快就見到一座白色圓頂的教堂在眼前. 上到去個公園, 有好多黑人賣d手繩, 但佢地好過分, 捉住人地隻手, 間硬擺條手繩落人地度逼人買, 老公一手”fing “開佢, 然後惱”bear” 住佢, 而我就特別小心財物, 驚比人搶野呀! 好彩都係有驚無險. 之後就坐係公園仔食sandwiches 當lunch. 本來打算用d麵包皮餵白鴿, 但見咁多黑人係度, 都係拿拿聲走, 繼續向上行, 但我越行越索氣, 梗係啦, 話明係小山丘上, 上山當然索氣啦! 去到教堂下的樓梯, 有人搽白自己塊面, 著白衫扮石像, 有d人唱歌彈樂器, 重有好多人坐係樓梯傾下計, 我覺得好有藝術feel, 不過我已經行到索晒氣. 入到教堂, 裡面唔準影相, 雖然好多人影, 不過我地都係守規矩, 費時比人話咁樣衰. 而且我總係覺得梵蒂岡的聖彼得大教堂最靚, 巴黎聖母院都唔錯, 相比之下, 呢度無乜特別. 匆匆參觀完, 就去旁邊的蒙馬特區, 老公話當年來呢度有好多小攤檔幫人畫下人像, 不過今日就變左美食攤檔, 而且人好多, 我地行左幾步就走, 因為老公好想參加主日崇拜, (我地去旅行如果遇上星期日, 通常都會係香港揾定當地教會資料, 方便參加崇拜) 我地係瑞士已經miss 左一次 (老公send 過email 聯絡當地教會, 但出發前都無人回覆, 所以無去), 呢度離個間華人教會好近, 佢唔想遲到呀! 而且佢以為崇拜係3:00pm, 更加心急想走.





我地打算去的教會 (巴黎中華宣道會) 係火車北站附近一間大教堂旁邊, 我地沿著指示牌揾到間大教堂, 咦! 無人既, 然後周圍望下, 身為宣道會會友的我突然見到個熟悉的logo, 係啦! 係呢度啦! 跟住就遇到都係來返崇拜的會友教我地入去. 入到去全部都係中年華人, 也有年輕一輩, 佢地見到新來賓, 非常熱情招呼我地, 請我地去副堂飲杯野, 跟住傾下計, 搞到有d唔好意思添. 然後我地坐低, 安靜預備崇拜. 崇拜開始用普通話, 法文翻譯, 而講道部分就分開, 想聽法文的就去副堂, 聽中文就留低 (普通話講道, 廣東話翻譯), 我見好多年輕人都去晒法文個邊. 不過, 我地真係有d累, 所以講道個陣又訓著左. 崇拜完畢, 牧師同其他會友都來同我地傾下計, 但同我地傾計的都係移左民幾十年的中年人, 或者佢地覺得在他鄉遇到故人掛. 我問佢地點解崇拜係下晝, 佢地就話呢個已經係好多年的做法, 因為好多華人都係做餐館, 從事飲食業, 呢段係落場時間, 可以方便佢地返崇拜, 看來無論去到邊, 上一代華人的出路都係做餐館. 最後有位弟兄再次提醒我地巴黎的治安唔好, 要小心財物, 也表示好欣賞香港弟兄姊妹, 因為覺得我地信仰根基好, 大家一齊努力啦! 當我地準備離開去凱旋門, 又有另一位弟兄教我地去. Anyway, 再次多謝巴黎中華宣道會的弟兄姊妹熱情招待.



跟住我地就去凱旋門, 出發前, 都係先醫個肚, 今次係Subway 買左個餐, 有好大份的包, 我同老公Share 都覺得好飽. 呢間餐廳係香港既Soho 同灣仔都有分店架!

食飽飽, 去凱旋門啦. 尋日去LV路過, 今日要仔細d參觀, 我一直都以為只係一座門, 原來可以行上去, 裡面重有個展覽館講述凱旋門的歷史. 咁真係要看看啦! 出左地鐵站望過對面就係, 而呢度亦都係香榭麗舍大道的街頭, 要行近凱旋門, 就要經過條行人隧道, 隧道裡面有售票處, 可以買登上凱旋門頂的入場卷. 每位Euro 9. 當時拱門底正在舉行一d紀念儀式, 當我地去到入口, 儀式就岩岩結束, 我地就可以係拱門底行來行去. 要上凱旋門頂, 先要行二百幾級樓梯, 我又行到索晒氣 (好彩頭先食左野咋!), 中間係展覽廳, 講述凱旋門的歷史. 建築方式及門上d雕刻的意思, 也有model 放大個雕刻比人參觀, 再向上行就係觀景台. 可以見到由凱旋門做中心分出12條街道, 但今日係星期日, 有d街就多車多人 (eg. 香榭麗舍大道), 有d就車影, 人影都唔見. 呢度都可以看到巴黎景色, 都看到聖心教堂, 艾菲爾鐵塔等. 老公就把握最後機會影晒d 菲林相, 而我就靜靜地欣賞下巴黎的景色. 後面重有新凱旋門, 不過只係一個四方形的窿, 有d格格不入. 我地係上面逗留左個幾鐘, 入夜了, 我地走啦! 呢個係我地係巴黎最後一個景點, 聽日我地就要返香港啦! 旅遊書話有lift, 但老公唔信, 走個陣終於比佢發現有lift, 所以我地都費時行, 搭lift 算啦! 跟住我地再行一小段香榭麗舍大道, 街上的店舖都關門, 而戲院就有function, 地上舖晒紅地毯. 去到King Geogre V 站就搭車回程.



回程第一件事就係去番個間internet bar 做online check in, 今次終於做到啦, 我地搞點BA, 再係BA個邊做埋CX 的check in. 但我地再返去CX 個website 想轉座位, 車…. 都做唔到, 乜個check in system 咁唔user friendly 架! Anyway, 既然係window and aisle seat 就算啦! 搞點就去食飯, 我地從另一個方向去番唐人街, 沿途見到寫簡體字的麥當當, 重有其他中餐廳, 中文天主教堂等等. 今晚又去另一間中餐廳, 不過呢間無咁friendly.

食完返到酒店, 譚生係度, 我就想同佢影張相留個紀念, 不過佢婉拒了, 譚生又問候下老公的情況, 呢個時候, 老公覺得舒服左好多, 可能去聖心教堂的路途中出左一身汗, 所以好好多, 我地取回今早寄存的LV 袋. 而上次係lobby 燙衫個位小姐又係度, 我地都唔阻住人地傾計, 返房休息啦!

歐洲之旅 – 巴黎: Shopping day - 香榭麗舍大道, 春天百貨, 老佛爺百貨

11/10 (星期六)

老公打敗仗了, 感冒的情況比尋日更嚴重, 我建議反正買左旅遊保險, 看醫生有得claim, 而且聽日係星期日, 聽日想揾醫生都無啦! 不如早d看醫生. 到達lobby, 譚生仍未放工, 我地就問他附近有無醫生, 原來前面有個中國藉醫生, 咁我地拿拿聲去啦!

去到醫生度都有好多人排隊, 我地等緊個陣就隨手拿了本東周刊來看, 本雜誌係舊年的, 重講緊舊年的香港小姐, 不過本雜誌裡的廣告就係當地的產品. 輪到我地, 醫生好詳細檢查, 認為老公只係少少感冒, 唔使食antibiotic. 開好藥單及收據, 我地就要去附近的Pharmacy 取藥, 藥房的職員將藥物的標貼貼回藥單上. 醫生連藥物共Euro 34. 跟住就食lunch.

老公想去番尋晚街口間餐館食lunch, 入到去唔算好多人, 揾個位坐低先. 老闆娘認得我地, 而且見到老公包藥, 就順便問候下, 重話呢度要買藥要有醫生紙, 佢再望下d藥, 覺得幾強, 特別係收鼻水個隻, 也建議要休息先會好. 老公覺得好有人情味, 真係多謝關心啦! 今日我地認真d看menu, 發現有set menu, 包括越南春卷 or 湯, 一味小菜, 白飯同埋飲品, 每個餐Euro 12.5, 我地一於試下, 個湯OK 啦, 春卷都唔錯, 至於小菜, 好大碟, 尤其是係我碟炸雞, 不過味道就濃左d, 越來越多人來了, 前面有個鬼老重叫左個點心餐, 學我地一盅兩件, 不過可能係習慣左, 佢竟然係中國茶加糖, 好搞笑. 食完飯, 我地就開始今日的shopping day. 第一站: 香榭麗舍大道LV朝聖.

搭地鐵話咁快就去到King Geogre V 站, 行過對面就係, 而望向右邊就見到凱旋門, 一場來到, 梗係要影張相啦, 然後就急急腳過對面, 入去之前, 老公建議我係隔離HSBC羅d錢, 都好, 費時唔够錢啦! 入到去好多人, 先揾下我看中果個款先, 咦! 真係平過香港wor, 買得過. 行行下見到個幾新既款, 就問店員拿來看, 點知呢位人兄係專做shop display, 所以佢有d發脾氣話: I am not the sales person. 哎呀! Sorry! 跟住好快有sales girl follow up, 佢周圍揾個款比我看, 但我最後都無要果個款, sales girl 又建議我地上樓上, 因為人少d. 咦! D服務態度比我想像中好好多. 上去樓上個陣, 我好爭扎, 究竟買手袋定銀包好, 手袋好似抵d, 但我本來個銀包爛左, 真係想買個新的. 老公見我咁苦惱, 提出送一個比我. 本來我都唔想, 因為我又未揾到新工, 佢個burden 好重, 但佢話當係預支禮物, 嘩! 真係架! 咁好啦! 多謝老公! ^o^ 樓上真係清靜好多, 而且有識講普通話的店員, 看來佢地越來越重視中國遊客. 最後我都揀左係香港已經揀中個兩個款, 我仍然好爭扎, 老公就話買啦, 好啦! 買啦! 真係好巧合, 我每次買LV都係外國買架!



買完之後, 我地就行下呢條咁出名既街道, 今日係星期六, 條街特別多人, 而且好熱, 路邊好多賣sandwich, pancake 的地方, 其中一間好似做得麻麻地. 個pancake 皮濃晒, 不過都排晒長龍. 我地入左去岩岩係香港開分店的Sephora 看下化妝品, 不過都比香港貴, 重要用credit card 先可以退稅, 所以都無乜收穫, 沿途重經過bontique, drug store, 我都入去望下, 因為條街好長, 足足橫跨五個地鐵站, 我地都無打算行晒, 所以, 都係時候去下一站.



下一站係春天百貨, 外面裝修緊, 所以行人路好逼, 入到去, 都係一般的百貨公司, 不過而家減緊價, 貨品多數係名牌, 我係香港都好少買, 所以都係齋看, 跟住我地又去男裝部, 老公看中的, 都要幾千蚊HK dollar, 佢重懶醒話自己看中的都係貴野……. :p. 最後我地去家品部, 有d都好靚, 而且我地見到d煲好重, 都唔知用乜野物料做的. 本來都想看看有d乜野岩父母, 話晒都係法國買的, 但真係唔多岩佢地, 所以, 都係無買.

最後一站係老佛爺百貨, 入到去都係人山人海, 個天花好靚, 係圓形的玻璃天花, 但貨品都係無分別, 男女裝部都無收穫, 最後我地去supermarket 買左d小食, 雪糕, 然後就走啦! 係回程的地鐵上, 我地又見到第一晚係餐廳賣花的黑人, 帶住好多花去開工. 希望今晚佢可以做多D生意啦!



返到酒店放低LV戰利品, 休息下, 食下頭先買的小食. 咦! 老公發現點解Shaver 旁邊有d好似髮腳的東西, 應該比人用過啦! 都真係幾過份, 我地好奇怪, 點解佢咁隨便用陌生人的私人物件, 佢唔驚嗎? (當然我地都驚佢都有病啦!) 跟住即刻落樓下同職員投訴, 佢除左say sorry 外, 就只可以比D alcohol 我地消毒, 跟住就去樓下間supermarket, G20入下貨, 老公認為我來法國未試過食劍 (法式長麵包), 都未算來過法國, 不過, 賣晒啦! 我地買D麵包, 飲品, 然後又買左香港未見過的Lipton 果味茶包同埋家樂牌冲沖湯. 最後返酒店放低d野, 再去附近的internet bar 做online check in.

譚生話比我地知附近有 internet bar, 我地揾左一陣就揾到, 呢度由d南亞裔人打理, 每5分鐘Euro 0.25, 都OK 啦! 上網的地方係個好隱弊的地牢, 我地即刻上CX個website, 搞左好耐都唔點, 原來因為我地先搭BA去倫敦再轉CX返香港, 我地要先check in 左第一程先得, 但BA只接受on board 前24 hours 的check in, 所以, 做唔到….. 既然上緊網, 不如順便check埋email, 看yahoo news. 嘩! 好多email, 都係呢個時候先知道甚麼金融海嘯. 哎呀! 我開始擔心返香港揾工有麻煩啦! 既然今日做唔到online check in, 唯有聽日再來啦, 問清楚個opening hour, 原來由9:00am – 11:00pm, 嘩! 都好長時間wor.

又要揾地方食飯啦! 今次我地去番第一晚食飯條街附近, 雖然老公食左一日藥, 但好似唔乜好轉, 仍然好唔舒服, 最後我地去食PHO 越南牛肉粉, 我地唔多明個menu, 但侍應又唔係好識講英文, 好彩有位熱心的客人解釋比我地知. 唔該晒! 最後我地都有碗熱辣辣的牛肉粉, 每碗Euro 7, 呢個時候我又掛住香港的牛肉河啦!

食完返到酒店, 譚生開工啦! 佢到問候下老公的情況, 又比左d私貨aspirin, 蜜糖比老公, 我就有私貨普洱茶, 我地又坐係lobby 傾下計, 講下三聚氰氨等等, 重叫老公只要多d休息, 用d藥輔助下就OK, 我好同意法國人對 flu 的treatment 的方法, 休息永遠係最重要, 不過香港人乜都要快, 醫生只會開d強力藥等個病人快d好番. 其實呢個concept 好錯, 不過無計, 香港人就係咁架啦! 而老公就覺得同呢區D人相處得開心D, 因為唐人街人情味濃厚D.

歐洲之旅 – 巴黎: 聖母院, 歌劇院, 羅浮宮

10/10 (星期五)

今日打算去幾個景點, 一早我地就去巴黎聖母院, 聖母院在西堤島上, 是一座典型的歌德式教堂. 當我地出左地鐵, 就見到對面馬路的教堂有好多人排隊, 我地見隊就排, 老公就走去前面看清楚係唔係我地要去的地方, 果然…. 我地真係排錯隊. 拿拿林走再揾過, 好快我地就來到聖母院. 參觀聖母院並不需要入場費, 但上去教堂頂部就要啦! 我鐘意看教堂內的彩色玻璃窗, 配上黑孟孟的教堂, 感覺好莊嚴, 但又好神秘. 圓形的玻璃窗直徑很大, 很特別. 裡面有很多地方讓人點蠟燭, 小的每個Euro 2, 大杯的每個Euro 5. 我和老公對這儀式感受不太好, 有種”略水” 的感覺, 而我就覺得像添香油, 只是西式版本而已. 當然, 也有些遊客來點蠟燭, 但看她嬉皮笑臉, 或許她像中國人的心態, 入廟拜神, 求個心安理得. 當然, 我們仍看到有些信徒跪著禱告, o殊…. 還是不要打擾她了. 另外有一個展覽廳, 裡面展出一些服飾, 但老公見到連Enfant (應該是指嬰孩掛)都要收錢, 實在不敢恭維. 參觀完畢, 我們也不打算到教堂頂部, 因為到頂部只係參觀其雕刻.



離開聖母院, 我們先到兩個地方check 時間, 首先到賽納河邊看星期日有無船河, 沿著河邊走, 感覺蠻舒服的, 不過河水就比較污糟啦! 找了很久, 終於找到啦! Check 過星期日都有船, 咁星期日就來這裡啦! 然後我地就去羅浮宮, 旅遊書話星期五下午6點入場, 入場費係Euro 6. 我地要確定這資料是否update, 同時也要確定今晚6點後是否開放. OK, 所有資料都收集好, 係時候食lunch.



我地坐地鐵到協和廣場附近, 旅遊書話個度都有間法國餐廳, 反正來到這裡, 去試下啦! 順便試下正式的法國菜. 餐廳在小巷內, 問左好多途人都唔知, 只好自己找, 誤打誤撞, 找到了立即入去坐下, 最初招呼我們的侍應都OK, 但入到裡面, 輪到一個肥佬招呼我地, 他安排我地坐在很逼的位置, 我們本想坐在外邊, 他都不肯, 跟住我問他要English Menu, 他表示這已是English menu, 然後他講了些我們聽不懂的法文, 旁邊兩個OL 陰陰嘴笑, 看來是些難聽的說話, 我看在眼內, 心裡不舒服. 隨後有一位日本女士進來, 看來對他的態度也不太好. 午餐包括頭盤, main course, dessert 及red or white wine, 每位Euro 23.5. 我們都覺得味道一般, 不過, 總算試過啦! 而且最令我不高興的是他們對亞洲人的那種態度.

飯後我們步行到巴黎歌劇院. 途中經過瑪德蓮區, 這裡都係名店集中地, 而我都有入去Longchamp 格下價. 步行15-20分鐘, 就見到一座有金色雕塑係屋頂的建築, 應該係呢座啦! 前面正在維修, 只好行去後門入場買飛, 點知原來unemployed 半價. 老公同售票員解釋了, 我就買左半價飛. 哈哈!

入到去裡面, 首先見到Grand Staircase, 所有的大理石質地好好, 雕刻也很細緻, 感覺好grand. 不過我覺得要小心, d大理石立立令, 好似好容易滑倒. 然後我地進入大劇院內, 嘩! 就好似d西片咁, 有一個個包廂, 感覺好豪華, 香港文化中心簡直無得比, 係呢度欣賞歌劇真係零舍唔同. 不過當然有人正在搭佈景, 我覺得個佈景同現場氣氛格格不入. 最後我地參觀個Foyer, 無論係吊燈, 雕刻, 裝飾都好豪華, 試幻想下d上等人著靚靚, 中場休息係呢度…… (喂, Anita 唔好發夢啦)不過, 呢個先係我心目中歌劇院的outlook.



參觀完畢, 行去歌劇院外, 就見到巴黎好出名的百貨公司 – 老佛爺, 等我影張相先, 聽日先來參觀. 然後我地就返去羅浮宮附近, 找間coffee shop 食tea. 我一直都好想一個休閒的下午在coffee shop 飲下野, 食下tea. 而家可以啦! 行左幾間, 揀左一間有tart 賣的coffee shop. 招待我們的可能是老闆吧, 佢唔識英文, 但又唔比另一個店員幫忙, 講野的態度好似想鬧人一樣, 不單對我地, 對那位店員也一樣, 我地只好按對menu的理解點食物, 老公驚訝在旅遊點附近的商店職員竟然一點點英文也不懂. 我點了Strewberry tart, 老公點了chocolate cake, 連飲品共Euro 18, 我地覺得食物質素都係一般啦, 但再一次感受到法國人的不友善!

食過Tea, 我地邊度都唔想去, 因為要留返d腳骨力今晚行羅浮宮博物館. 來法國之前, 我經常分不清凡爾賽宮同羅浮宮的分別, 而家清楚了, 凡爾賽宮係皇宮, 而羅浮宮係博物館. 我今晚一定要親眼看看蒙羅麗莎的微笑. 我地坐在羅浮宮外的廣場, 然後周圍望, 附近有其他博物館, 還有杜麗公園, 老公一直好想同我行下d公園, 因為這些都係佢上司同埋法國藉同事推介的好地方. 眼前還有一個好似凱旋門的建築, 這個稱謂騎兵凱旋門, 只可以遠觀, 唔可以行上去. 呢個時候, 老公好似有d唔舒服咁, 可能尋晚鐵塔太大風吹親. 等到差唔多六點, 我地就去排隊. 我又發現, 如果unemployed 來參觀係免費的. 嘩! 又節省了! 經過由華人建築師所設計的玻璃金字塔就進入羅浮宮, 快d排隊買飛先!



不過呢次無咁順攤, 外藉的售票員用很標準的普通話向我表示, 我要出示證明unemployed 先可以免費, 算啦, 我都無, 唯有乖乖比錢. 買完票我都忍不住讚她的普通話很好. 入到去本想租導遊器慢慢欣賞, 但時間無多, 還是多看幾件作品吧! 首先衝去油畫部分, 最主要還是去看蒙羅麗莎的微笑, 嘩! 好多人圍住副畫影相, 而呢副畫都認真巴巴閉, 有玻璃罩覆蓋著, 然後有專人企係旁邊保護, 重要有圍欄, 等人唔可以太接近幅畫. 不過, 每日咁多閃光燈對著呢幅畫, 對幅畫有無影響呢? 又或者, 呢幅畫係真定假???? 這都係我的疑問. Yeah yeah, 終於親眼見過呢幅名作. 跟住繼續參觀其他展品, 有勝利女神像, 畢加索畫展, 埃及文物, 希臘及古羅馬文物, 意大利和西班牙雕塑, 路易十五加冕皇冠等等, 每個展館的展品題材很不同, 畢竟每個國家都有自己的獨特文化. 去到意大利和西班牙雕塑一般都以耶穌, 聖母為題材, 我們還見到耶穌騎著盧進入耶路撒冷的雕塑. 當我們走到其中一些展館, 看到有些年輕人坐在某些展品旁邊畫畫, 他們很認真, 一面望, 一面畫, 看來是對畫畫有興趣的人甚至係藝術系的學生, 在香港又怎會見到這種情景呢? 雖然我地都走馬看花地參觀了幾個展館, 但博物館共四層, 我們跟本行唔晒, 只好到bookstore 買本書, 日後打開書本繼續參觀. 四個鐘頭很快過去, 我地都行到腳軟, 又係時候講拜拜.





返到酒店附近, 又係時候食晚飯, 街口也有間中國菜 + 越南菜小餐館. 咦! 楊州炒飯Euro 4.5, 乾炒牛河Euro 6.9, 價錢好似比第一晚個間平, 一於試下. 入到去, 我點左炒貴刁, 老公點楊州炒飯, 重點左蝦醬炒通菜同埋椰汁三色冰. 楊州炒飯就細碟d, 但個炒貴刁够鍋氣又大碟, 重有好耐無食過熱辣辣的炒菜啦, 三色冰都好好味, 椰汁味够濃, 老公見人地落左好多椰汁, 只係加左少少水, 老闆娘重話, d珍多唔係染色架, 老闆娘好殷勤招呼我地, 又同我地傾計, 而且價錢合理, 我地都會再來, 所以就問餐廳的營業時間. 老闆娘話11:15am – 3:00pm, 6:00pm – 11:00pm. 都係個句, 中國人真係最搏, 最勤力的.

返到酒店又見到譚生, 今晚有個靚女係lobby 度燙緊衫, 譚生同人地傾緊計, 我地都唔阻住人, 返房休息啦!