平安夜, 敬拜夜

平安夜, 明明有得早收工, 結果都搞到六點先走.... 唉! 鬼叫自己手腳慢 :<

離開公司, 去買定禮物聽日用, 哈哈, 買左叮噹遊戲棋, 好鬼得意呀!!!

返到屋企, 老公已經返到, 重掃埋地添, 老公真係乖, 抵錫~~~~~~~~

今晚食乜好呢? 好想浪漫一番, 不如去屋企附近的餐廳, 最後我地去左YWCA 的翠屋餐廳, 係我中學時代成日去的地方.

聖誕大餐, 位位$198, OK 啦, 哈哈, 竟然有位, 一於入去啦~~

入到去, 聖誕老人就送上小禮物, 我地一齊扮鬼扮馬

食物依然有水準, 難怪全場爆滿~~~ 重有大抽獎, 一如以往, 都係抽唔到 :<

抽完獎要快D走啦, 今晚要去St Andrew's Church 參加Midnight service.

去到教堂, 好多人排緊隊, 我地搵返W先, 派完籌再等到11:00pm 開始入場. 入到去, 敬拜隊已經帶領大家唱詩, 係我地耳熟能詳的聖誕歌.

崇拜開始, 當中只係唱詩, 讀經, 讀出聖經記載耶穌出生的經文, 然後是candle lgihting. 真係好好feel. 讀著這些經文, 還有詩歌, 幻想著2000多年前的伯利恆

那刻, 好感動.

講道只佔好少時間, 不過牧師提到那些牧羊人見過小嬰孩後返回工作崗位, 但卻是帶著真平安, 這真平安, 你有嗎?

這才是聖誕節的真正意思, 一同慶賀耶穌來. 耶穌來, 就是帶給人真平安, 也帶給你和我完備的救恩, 這真平安, 你有嗎?

希望大家除了吃喝玩樂, 也找到聖誕節的真正意義以及同你的關係.

再見舊團友

聖誕日, 一覺訓醒已經12:00pm, 嘩, 要快D起身準備今日的party.

打完掃, 落街食完飯, 我同老公就分AB隊, 老公去換蛋糕, 我就去supermarket買野食.

三點鐘, 大家都到齊, 大家影下相然後開始介紹下自己, 同埋玩遊戲.

抽獎時間到啦! 人人有份, 永不落空. 而屋企的米奇老鼠房門, 成為大家的影相熱點.

最後茶點時間, 我地買左豐富食物, 重有懷舊的波蘿腸仔, 大家食得好開心

快樂時光過得特別快, 又係時間講拜拜, 希望好快再見大家

正當我地以為今晚會靜靜地過, 點知, 又有驚喜.......

11:30pm 老死J打電話比我, 大我地話去唱K, 算啦, 大家都唔係18, 22, 落樓下甜品舖算啦. 點知連甜品舖都休息......

結果, 一行四人去過黃家bar隊diamond black, 黃家bar 禁煙又安靜, 靜靜傾下計, 掃清D零食. 好爽呀!

聖誕節, 原來變左良朋歡聚日.

與新同事相聚

22/12

又到聖誕, 各大部門都有Christmas Party. 我地個department 就去沙田Ruby Tuesday.

秘書小姐早就安排好食物, 我地去到就食食食. 有Salad, 洋蔥圈, Ribs, Steak, Pasta等等.... 好豐富呀!

飯後甜品.~~~~~ 大大杯雪糕, 雖然好飽, 但係雪糕當前, 我點會放過.....

嘩! 重有大抽獎添. 我有獎呀~~~~ 登..登...登..瞪.....

City Super $200 gift card. 正呀!

好快又到放工, 呢餐都未落格, 今晚有更豐富既等緊我地. 我地一行六人去中環Soho 食蠔, 飲Champaign....

D海鮮, 好新鮮, D蠔呢? 好肥美.... D蟹呢? 啖啖糕, 好好味, 我地齊齊隊膽固醇啦!

大家有講有笑, 原本好安靜, 情侶喁喁細語的地方, 比我地搞到無晒mood.

食到11:30pm, 人地都要打烊我地先肯走, 上司D趕住返屋企, 其他人就繼續下一場. 而我呢, 我都唔識飲酒, 都係返屋企交人啦...

胡桃夾子

由細到大都知道一個關於聖誕節既故仔 - 胡桃夾子, 但係呢個故仔講乜既呢?

今年香港芭蕾舞團又做呢個芭蕾舞, 撩老公去看, 得到既答案係...... 無興趣

-_-" .... 唉! 無計, 算啦....

點知同同事N 提起呢件事, 佢都好有興趣. 於是就相約一齊去. 我地買左19/12個場, 而票價係$260, 不過, 看個sitting plan 好似幾前 wor, 係真唔係呀?

終於到19/12 啦, 我地放工後係尖東站隊左串燒賣, 就拿拿林趕去文化中心. 好彩無遲到....

入場啦, 嘩! 我地個位係第二行, 真係好前 wor, 交響樂團就係我地前面, 呢刻我地覺得張飛好抵買.

開場啦! 我地靜心欣賞. 第一幕幾好看, 有D劇情, 內容清晰, 容易明白.

中場休息25分鐘, 第二幕, 只見舞蹈員跳出不同的舞, 有D悶, 我地差D訓著覺... 可能我真係唔識欣賞, 我都係鐘意音樂多D.

9:30pm, 散場啦, 我地兩個大鄉里總算看過, 完成左個小心願.

離開文化中心, 對面半島酒店D燈飾好靚, 忍唔住停低影下相

跟住就去食飯, 同事N 帶左我去佢鐘意食的拉麵店, 我個碗麵大大碗, 而且暖立立, 真係好好味.

返工之後

返左工三個星期, 掛住適應新環境, 而且 assistant S 呢個時候resign, 我既要適應新環境, 又要pick up 佢的工作, 而且S的last day 係16/12, 重有兩日就要自己解決問題, 其實, 我真係有D驚........

今日星期日, 趁住其他弟兄姊妹去左wild camp, 無人同我食飯, 我返完崇拜就拿拿林返屋企, 做番D一家之"煮"應做的工作, 就係打掃, 買送, 煮飯仔.....

又到冬天, 西洋菜隆重登場, 煲番個西洋菜湯先.....

重有, 又係冬天至有的......豆苗

同埋..... 海上鮮 - 白灼蝦~~~ 正呀!

兩個人溫馨晚餐閒話家常, 此刻無價 ^_^

友緣相聚之 - 食食食

今日相約H2H 朋友仔來我地屋企玩...

尋晚好夜訓, 而且半夜起身有D凍親, 今朝起身好似有D唔舒服, 卒之繼續訓覺, 連教會都無返, 起身食D藥後, 就開始打掃下間屋.

老公從教會返來帶埋蛋糕, 準備今晚招呼朋友. 我打掃好間屋就一齊食Tea, 然後去supermarket 買多D飲品.

好緊張呀, 好快大家就上來啦!

E 帶左自家出品的baily cheese cake, 大家食到 lam lam 俐.....

今晚去左房署職員餐廳食飯, 大家見D送大件夾抵食都食得好開心, 不過, 呢度係獅兄飯堂, 估唔到連放假都要來食, 哈哈!

多謝大家送來的心意呀!

人可以向上帝禱告

29/11 (星期六)

練歌練左三個星期, 今日終於係佈道會啦! 下午場詩班員要3:00pm 報到, 準備rehersal, 不過等車等左好耐, 卒之都係遲到. 好彩重未開始練習.

去到大球場, M 已經幫我預留位置, 重係教會借左詩班袍比我. 真係好耐無著過詩班袍啦!

為左留力, rehersal 都係唔好唱到咁大聲.....

佈道會準時5:00pm 開始, 參加者陸續入場, 今日都算幾凍, 但都好多人參加. 我地4:45pm 開始唱詩, 好似迎接大家入場咁....

成個佈道會最令我感動, 就係成日係電視見到, 跳"開心舞" 那個小女孩.

去到呼召個陣, 好多人第一時間行到台下決志信主.

雖然坐係詩班席真係好凍, 但有份參與呢次佈道會, 我覺得好開心

集體回憶

28/11 (星期五)

今晚係返新工以來首個OT, 開完team meeting 已經7點幾, 覆番D email, 再同同事brief 番新的工作就已經8點半. 無所謂啦, 反正老公今晚會去教會一個姊妹的安息禮拜, 等埋先一齊食飯. 點知老公都要OT, 無去安息禮拜. 我地相係大圍站集合, 等埋出席安息禮拜的弟兄姊妹一齊食晚飯.

當我去到大圍站, 老公重未到, 所以我就行下大圍站的商場, 經過一間零食店就順便入去行下. 我見到好多細個時的零食, 例如迷你可樂糖, 四粒裝的吹波糖, 眼鏡朱古力等等. 最後我就買左眼鏡朱古力.

D朱古力...... 變成我地既飯後甜品. 嘻嘻!

飄零燕

自從去過瑞士之後, 真係好鐘意呢個地方, 風景好靚, 空氣好清新, 我重好掛住呢個地方.

大家記唔記得細個有套卡通片叫"飄零燕" 呀??? 凱迪的故事就發生係瑞士啦! 講真, 我只知道凱迪係個孤兒, 佢住既地方周圍都係草原, 其他的情節我都無乜印象. 可能我細個乖, 無看電視, 所以無追過呢套卡通片啦! 所以, 而家想再看一次, 順便懷念下瑞士的風光.

飄零燕同而家D卡通片相比, 感覺好唔同. 我覺得而家D卡通片失去童話的感覺, 只不過將成人世界搬進卡通裡, 我認為極其量只可以叫漫畫. 而故事裡的凱迪好有童真, 好熱心助人, 好熱愛大自然. 真係好有童話feel. 印象最深係凱迪的單純的個性同埋與彼得真摯的友情. 連而家D卡通片都失去呢種味道. 重有呀, 片中瑞士的風景好真實架. 雪山, 草地, 松果等等. 瑞士真係有呢D風景架! 所以我每晚都要追番幾集先訓覺.

如果可以再去瑞士, 咁就好啦!

有壓力, 唔知點解決!!!!!

今日第三日返工, 上司家中發生了事, 今日先返工, 所以, 我今日都係第一次同佢見面.

其實佢返到來只係同我打左個招呼, 之後佢都忙到死, 連傾多兩句都無時間, 然後就開tele-conference. 一開就開到12:45pm, 不過, 佢都問我知唔知邊度有飯食, 都算係咁啦!

下晝都係繼續read email, 見到大家的email 好詳細, 好小心, 僅守每個project 的timeline, 我心裡面不禁擔心, 以前D project 最多兩三個月就搞點, 而家呢D閒閒地都半年啦! 自己會唔會都做得好呢? 而家的工作同以前完全唔同, 究竟有無偏離我想要的career path 呢? 呢份係唔係我想要的呢??? 坐係office 發呆, 有D掛住以前的日子......

其實臨放工都有email 要send, 不過我實在唔知內容點寫好, 唯有想好點寫, 然後問下人啦!

求神讓我好好適應新環境, 也求神給我力量應付每一個難題.

開工了!

上個星期收到job offer, 為免有任何變化, 都係快D返工, 快D簽contract. 所以決定今日開工!

返新工感覺良好, 因為公司雖然係火炭, 但只需搭一程車就到, 算係好方便. 返到公司就去HR 報到, 跟住HR就比左好多文件我同解釋比我知. 然後就sign contract. 好lor, 好lor, 終於有份新工啦!

去到自己個層, 有位同事S接待我, 後來先知道呢個係我的subordinate. 佢幫我安排好電腦, 文具等等. 傾下傾下發現原來佢以前公司的supervisor 係我同學. 哈哈! 世界真細小. 中午食飯重係佢請添! 真係唔好意思, 希望我地合作愉快啦!

今日我supervisor 無返工, 下晝我都好得閒. 看過下HR的文件, 就搵同事S要D資料看看, 起碼知道下我呢個team existing 的project. 初來報到, 都係主動D, 等supervisor 有個好印象.

呢個就係我第一日返工實錄啦!

與老師的一席話

趁著悠長假期, 想聯絡好久不見的朋友們食下飯, 聚下舊, 之前曾經聯絡中學老師Miss L, 可能佢太忙啦, 好難安排時間, 所以佢一直都無覆我. 本來都打算放棄. 點知係假期結束前, Miss L 終於再同我聯絡, 我地相約今日下晝食tea.

其實Miss L今早要帶學生參加比賽, 返到來已經係下午3點, 連午餐都未食呢! 我地叫左豐富的tea set. 一面分享佢教學的苦與樂, 同時也更多了解她家庭的難處. 期間 Miss L的電話不停地響, 現在教師真的不容易呀! 己事, 家事, 學生事, 事事關心.

傾下傾下就過左3個鐘頭. Miss L 跟住重有節目, 要跑兩場呢, 都係時候要走啦!

呢餐, 當然係我呢個過氣學生請啦! 雖然我仍然量緊地.......

很有誠意的午餐

今日再到中環同S食晏. 今朝起身就上openrice 搵下有無心水, 突然比我搵返YWCA六樓的餐廳, 好啦! 一於去個度啦!

餐廳在中環半山區, 居高臨下, 個view 好正. 而且呢間餐廳的waiter 全部都係智障人士, 但就有好多名太係度做義工. 食物由佢地一手包辦, 所以用料非常充足. 前公司曾經係果度搞press conference, 我地發現waiter 們服務一流, 佢地做事非常認真. 單係呢份誠意, 再加上食物質素, 所以介紹S來呢度食.

我地叫左特餐, 有湯, 沙律, 意粉, tea or coffee. 我個粟米雞湯有好多雞肉, 沙律就最正, 蔬菜新鮮, 重有煙三文魚及其他cool cut. 意粉就細D, 不過食完個沙律都飽飽地. 唔經唔覺, 原來已經兩點, S都要返工, 但又想試甜品, 於是大家都決定take away. S都覺得值得同同事再來, 所以羅定卡片....

同S分道揚標後, 我就返屋企食蛋糕, 個蛋糕唔算好甜, 裡面加左D杏仁片, 好香呀! S都send SMS 比我話好味.

特餐 + 甜品每位$85, 以中環來說算係合理. 不過, 呢餐仍然係S請, 真係多謝晒, 等份工settle down 一定請你食飯 (我真係欠左好多人情呀!)

下次要同老公來支持下, 順便試下D美食

見工記 II

雖然有個job offer, 不過另一間公司一早約左今日interview, 同老公商量過, 今日都係去看看. 我一直以為今日下晝in, 點知尋晚check 番 email 先知自己記錯時間, 好彩望清楚咋 =_="

呢間公司係觀塘, 地點都算方便, 落左地鐵後都要行一段路, 不過好彩我行得快, 如果唔係實遲到. 去到間公司覺得眼前一亮, 個reception 感覺好cyber. 唔錯, 唔錯. HR 招呼我係間conference room 坐低等.

時間過得好快, 等下等下, 原來等左40分鐘先有人來見我, 但只係問D行野, 問左10分鐘就打發我走, 浪費我的時間.

Anyway, 一場來到觀塘, 而且悠長假期就快結束, 梗係搵D friend 食下飯啦. 今次就搵埋TT 一齊食飯.

我先去APM 6/F一間食烏冬的舖頭搵定位, 等TT 來到就叫野食, 呢度D烏冬好滑, 湯底都好好味, 最重要係可以同friend 見下面, 傾下計.

返到屋企都係唔想做家務, 又趁得閒煲下老公幫我download 的飄零燕, 懷念下瑞士的風光. 等今晚去打邊爐....

得左!

今個星期無乜interview, 所以繼續follow up 上個星期所見的兩份工作. 兩份工都OK, 不過, 我梗係想搵份5-day work 啦! 再加上工作性質, 我比較鐘意上星期二個份.

但上個星期五開始, 第一份工就開始聯絡我, 問我in 完覺得份工點, 又問我要d certificate 的copy. 似乎都有D眉目. 所以我拿拿林send比人, 而星期一都confirm 收晒所有cert.

尋日中午同T係中環食lunch, 食到最後, 又收到電話, 今次同我傾人工, 同埋confirm D個人資料. 嘩! 傾到人工啦! 應該都無走雞. 真係個好消息. T.. 你個餐拖住先, 等我真係settle down 再請你啦!

尋晚再send 晒所有文件比HR, 今朝又收到電話. 今次同我confirm 人工, 雖然比我要求少左D, 但都唔係相差太遠, 算啦! 跟住就要我提供前3份工的supervisor 的contact, 等HR直接同佢地做reference check. 嘩! 查家宅o羊! 無計啦, 唯有搵晒所有supervisor同佢地打個招呼先啦!

兩位ex-supervisor 好surprise 我呢個時勢搵到工, 但都warn 定我, 呢份工好辛苦.. 其實, 唔關我事, 都係神開路, 我先搵到工咋. 至於辛苦... 無計啦.... 有份不過不失的工已經好好.

來到呢度, 返工日子已經confirm 好晒, 但可能要完成reference check 先真係落實, 個感覺好似好唔實在. 而且重有好多擔心, 大公司, 大樹好遮陰, 但人事關係都好復雜, 我呢個大鄉里應付得來嗎? 重有, 呢份工作我又應付到嗎? 想到呢度, 真係驚驚地. 另外, 呢份工都係5.5-day work (不過長短週). 始終都搵唔到5-day work, 真係好失望.

下晝agency 打比我follow up 另一份工的結果, 結果係....... 衰左啦!

個刻都有D失望, 不過, 我都知自己的缺點, 所以衰左都唔出奇, 咁就疊埋心水, 安心返新工.

悠長假期就快結束, 呢幾日要好好休息下. 聽日重有interview 架, 然後繼續約friend 食lunch.

希望reference check 順順利利....
希望好快適應新工, 同大家相處融洽.......
希望好快上手........
希望順利過probation......
希望......

Anyway, 多謝天父為我預備新工作 ^_^

阿Ta整餅 take 2

今日係我同老公拍拖6週年紀念, 為左隆重其事, 老公就放半晝假陪我 (其實係返屋企休息下至真), 而我呢..... 我就決定整餅, 不過, 今次整曲奇餅.

未整之前, 先介紹下材料

1. cookie mix 一包

2. 淡味牛油110g

3. 雞蛋一隻

做法:

1. 牛油放在室溫下讓其變軟

2. 牛油 + cookie mix + 雞蛋, 搞伴至變成麵粉團狀

3. 放入180度焗爐內焗12分鐘, 直至變成金黃色

4. 搞掂

味道?! OK 啦, 話晒都係cookie mix, 衰極都有個譜.......不過, 個賣相唔多掂, 有D變左四方形, 有D農左, 有D個餅身好似"臨臨地". 我就唔多滿意啦!

今晚本來想出街食飯, 最後為左節省D, 都係留係屋企食飯, 平平靜靜地度過.

放入焗爐前的樣子

變左四方形

哎呀! 呢盤農左

比較像樣的作品

細佬過大禮

15/11 (星期六)

細佬出年結婚, 佢地打算早D過大禮, 方便早D派帖. 阿媽委派我同老公幫手送大禮去女家.

細佬選擇傳統方式過大禮, 所以一早返到屋企, 就見到所有過大禮的禮品. 阿媽話女家預備左的回禮禮物重多, 咁真係要見識下.

去到女家, 放低禮物, 就準備接收女家的回禮, 嘩! 真係好多wor! 其中最靚就係蓮藕, 新鮮蓮藕用紅色的袋包好, 重以為係乳豬添, 真係大開眼界.

交換好獎品, 我地離開女家, 然後就去食豬扒麵, 老公叫左杯茶走.

我自問一向服侍周到, 見杯奶茶, 就好順手落糖, 落左先醒起..... 呢杯係茶走 (奶茶 + 煉奶)....... 弊加伙!!!!

老公梗硬飲晒杯"甜到漏" 的奶茶, 跟住大家都去salon扮靚靚.... 過了個輕輕鬆鬆的星期六.

男家的禮物

女家的回禮

包裝精緻的蓮藕

見工記

12/11 (星期三)

尋日去完九龍灣interview, 今日就去炮台山. 呢間係醫藥行業幾有名的代理, 不過我send 左信成個月先有回覆. 見左咁多份工, 我真係希望可以join 外資公司, 一來接觸多D其他地區, 等自己眼光放遠D, 二來外資公司均真D. 唔知有無機會呢? 真係要上面果個開路先得.

講番呢份工, 當然係港資啦! 所以D要求真係好唔掂, 話就話Product Manager, 實際係Sales Manager + Marketing Manager + Graphic Designer. 唔係化! 一份比以前多少少既人工, 但要一次過滿足晒三個願望... 有難度wor!

以下節錄部份interview 的內容:

Part one
Interviewer A (IA): 我地呢度無分得咁清楚, 只係分Ethical 同埋Consumer product. Product Manager 要照顧晒所有key chain..... 當然希望以後開新account 啦....

Anita (Ta): 我比較熟悉Product Manager, key chain 方面要D時間

IA: 咁你會唔會請教下你D舊同事呀?

Ta: 都會既 (心想: 唔係化, 而家就要我做野, 我都未話黎做)

Part 2
Interviewer B (IB): 你對電腦有幾多認識

Ta: um..... Microsoft office 常用program 都識用

IB: 咁你識唔識AI?

Ta: 因為以前所有design 都係比design house 做, 所以我唔識呀! (心想: 有無搞錯呀, 連graphic design 都要做埋?! o_o)

Part 3
IB: ..... 其實sales 同marketing 係分唔開架, 所以好多公司都要求員工做過sales 先可以做marketing

Ta: 哦! 係既, 係既!! (心想: 你都痴線, 大把公司sales 同marketing 分得清清楚楚)

最後佢地見我好猶疑, 就問我使唔使考慮下先, 我即刻話要, 就結束左呢個interview.

離開呢間騎呢公司, 即刻打比老公, 老公聽完我的遭遇都破口大罵. 但係, 我心裡面又想, 不如做住先, 點知會唔會有份工真係滿足我所有要求...而且跟住的日子更唔好過.....

離開炮台山, 搭ding ding 去中環幫老公整shaver, 然後就搭船返屋企, 準備換件衫返祈禱會

去到TST, 海運大廈的聖誕燈飾應該整好, 等我暫時放低煩惱去look look 先... um.... 我覺得麻麻地, 整體以啡色為主. 我覺得唔夠sharp..... 不過, 夜晚看可能好D.

又到聖誕, 又到聖誕

今日又去九龍灣interview, 上次途經德福商場, 見到成個商場都佈置到好Christmas feel. 今年經濟咁差, 商場都要早D做好聖誕promotion, 等多D人來消費.

今日帶埋相機, 係interview 之前輕鬆一下, 影左幾張相.

嘩! 扮晒凡爾賽宮的畫.....

God will make the way

今個星期又開始interview 的生涯, 今早的interview 都好似好positive, 當我對今早的工作多左了解, 自己都覺得OK, 唔知會點呢?

返到屋企開始聯絡agency follow up 番兩份工作的進度, 知道另一份工都會有second interview, 個刻都好開心架, 跟住當然係著手預備聽日的2nd interview. 我都有問下agent 關於呢份工作的待遇, 點知個agent 幫我propose 的已超過我所想所求. 不過, 都係個句, 請我先算啦!

下晝收到母會傳道人的email, send 左首好有意思的詩歌比我, 個刻對我好大鼓舞, 更加confirm 天父必預備和帶領. 同大家分享下啦!

God will make the way

God will make a way where there seems to be no way.
He works in ways we cannot see. He will make a way for me.
He will be my guide, hold me closely to his side
with love and strength for each new day.
He will make a way. He will make a way.

Be a roadway in the wilderness He'll lead me.
And rivers in the desert will I see.
Heaven and earth will fade but his word will still remain.
He will do something new today.

支持愛心粥檔

早排生果日報報導愛民村冬菇亭粥檔每日都派粥比老人家, 今日同老公去愛民村食粥支持下. 不過上去之前, 我地食個茶餐打底先. 點知, 就係屋企樓下撞番十幾年無見, 小學一齊係教會長大, 後來做埋中學同學的姊妹Fiona. 十幾年無見, 當街當巷都要來個抱抱……

老公成日心思思想去愛民村, 因為d blog 友話商場裡面賣高達模型平d. 趁個茶餐未落格, 去行下個商場先. 商場內有兩間模型舖, 老公兩間都行勻晒, 果然比大埔平, 佢又心思思想買. 唉! 行下先啦, 食完粥再算.

我地又行下商場外其他小店, 竟然發現呢兩間舖頭




哦! 有人做秘撈….. 我重做左老闆娘添……

都係早d去食粥, 費時去到人地收檔, 粥檔係冬菇亭後面部分, 面向君逸山, 食粥的人唔多, 好多都係街坊買完菜坐低食啖粥. 我地叫左艇仔粥, 炸兩同埋油炸鬼, 個粥都幾綿, 而且幾多料, 油炸鬼雖然凍晒, 但都係脆的. 牆上貼左紙“長者免費早餐”, 另外記錄左善心人的捐款, 我地total 食左$21. 不過同檯有個師奶好似無看報紙, 竟然問老闆 “乜你派粥o羊?” =_=”



食完粥行過麵包舖, 見到好多細個好鐘意食的西餅, 忍唔住買左幾個



最後, 老公都係帶左佢心愛的高達模型返屋企……… 唉!

阿Ta整餅

今日我又有新嘗試, 就係學整餅, 地點係大埔翠屏商場內. 我貪佢個別授課價錢合理, 唔使自己買晒D工具就可以學整餅, 又唔使洗, 所以我千里迢迢入去學.

我一去到就見到導師預備好材料, 可以即刻開工. 原來做法都好簡單, 首先做餅底, 然後打好cheese 同埋sour cream, 將打好的cheese 倒入蛋糕模內, 跟住焗50分鐘, 再將準備好的sour cream 倒在cake 上面再焗10分鐘, 最後放入雪櫃雪3個鐘就OK.

其實我參與的部分唔算好多, 做餅底, 打cheese, 打sour cream等, 而導師就會從旁幫手同埋執手尾. 個蛋糕做好啦! 導師幫我pack 好, 我就即刻返屋企, 我係巴士度都聞到陣陣香味, 個刻真係好有滿足感架! 返到屋企, 拿拿聲打開來看, 咦! 點解sour cream 移晒位, 離開左個cake, 有D重散晒. 嗚... 嗚... 嗚... 下次我會小心D....

個導師其實幾cool, 好似想拿拿聲教完你就算. 不過作為初學, 怕自己三分鐘熱度 or 以後無時間整而唔想買工具, 我都會繼續嘗試的. 下次可能買佢D套票, 然後慢慢整, 咁重抵D.

可惜上面的sour cream 散晒, 我將佢修復番, 此乃意外, 實屬不幸. 唉! T_T

超懶惰洋蔥湯

今日下晝有個interview, 尋晚都無好好預備過, 但今朝起身仍然有D興, 所以都無乜心機預備, 死就死啦, 反正我都無乜信心.

下晝in 完, 打電話問老公今晚想食乜野, 最後我地都決定係屋企煮飯. 不如今晚食意粉, salad. 早排係人地個blog 度見到有個簡化版洋蔥湯, 好似好容易, 不如今晚試下.

材料:

洋蔥兩個

雞湯 (375ml) 2盒

懶人做法

1. 先將洋蔥切碎, 然後炒香至少少透明

2. 加少許雞湯煮一陣

3. 倒入雞湯中煲半個鐘

4. 加少少胡椒粉

5. 搞點

味道勉強OK 啦.

German 真係好難學

歐洲之旅之後, 我繼續係屋企放大假, 不過呢輪金融海嘯 + year end, job vacancy 真係少左好多. 與其坐係屋企, 不如搵D野學下, 充實下自己, 另一方面都想同老公一齊上堂, 所以決定搵D大家都有興趣的course, 今次我地學德文. 不過, 為左試下自己係唔係真係有興趣, 我地決定報工聯會既德文初階.

今日終於開始上German 啦! 去上堂之前竟然撞到老公D 同事, 原來大家都係去學German. . 哈哈, 多左幾個新同學仔!

開始上堂, 嘩! 德文字母的發音真係翹口..... 好難讀呀! 不過, 真係想學多D野, 希望唔好半途而廢啦!

上完堂同老公D同事一齊食飯, 雖然無乜話題, 不過有人搞下笑互窒下, 其實都幾開心丫!

歐洲之旅 –後記

嘩! 返到香港2個幾星期, 終於寫完長篇大論的歐洲遊記! 雖然話仍然放緊超級悠長假期, 但呢2個星期其實都好忙, 忙乜野? 忙搵工, 忙去agency 度interview, 忙做家務, 忙見下d friend….. 但不忘寫好呢個blog. 對我來講, 望返自己寫過的article, 真係好有滿足感. 再回看成個旅程, 有好多野好感恩.

多謝天父: 讓我好好享受勞碌的成果, 讓我有富足, 可以係無工做的日子去兩次旅行. 讓我地旅程中有美好的天氣, 重可以用較平的價錢買心水LV 袋, 重有, 旅程中每次讀你的話語, 都有很多領受.

多謝老公: 肯放下工作兩星期陪我去歐洲玩多次, 比我一個咁開心的回憶. 其實返到來佢真係忙到死, 晚晚OT 到八點幾九點. 無計, 學佢話齋, 有咁耐 xx, 有咁耐yy….. 最後老公重忙到病左添. 哎呀! 陰功仔羅…., 重有呀, 佢全力support 我寫呢個blog 架! 真係好抵錫. 等我趁呢段時間煮多d好野比你食啦!

多謝各位好友: 我都知呢十幾篇野都長篇大論, 文字多, fonts 又細, 相又少, 但你地都咁有耐性, 肯來看呢個blog. 你地係Facebook 的留言變成我的動力繼續寫落去.

多謝自己: 肯坐定定寫咁多野… yeah! ^_^

歐洲之旅 – 暫別歐洲, 返到香港

14/10 (星期二)

下晝四點幾, 班機終於到達香港, 歐洲之旅正式結束, 我地都要重返現實生活啦! 一落機, 第一件事就係同阿媽, 奶奶報到. 點知原來佢地記錯我地抵港時間, 一早已經打電話去屋企搵我地, 當然係無人聽啦. 過左passport control, 取行李 (今次兩件都齊晒), 就返屋企, 一出機場, 天氣好似涼爽左, 不過, 出面仍然有一層薄紗, 唉! 呢個就係香港.

機場巴士慢慢駛入市區, 唔知點解彌敦道鬼咁塞車, 見返人多車多空氣污濁的香港, 令我有d掛住瑞士的生活….

返到屋企已經六點幾, 我地用最快速度unpack 行李, 同埋將d朱古力放好…跟住落街食飯, 好掛住d魚生, 壽司, 今晚食日本野啦. 食完野返屋企上網, 大家都好掛住自己部電腦…… 老公放完假啦, 聽日要返工, 佢要早D訓啦. 而我… 真正的考驗先岩岩開始咋.

瑞士買的朱古力大晒冷, 另外係瑞士買左包瑞士糖. 重有瑞士軍刀, Edelweiss 乾花擺設.

巴黎 + 希斯路機場的戰利品

LV 袋 + 銀包 (銀包係自己買架)



老公送贈的LV袋 (雖然預支左幾份禮物, 不過都值得架!)